გარემოსდაცვითი ზედამხედველობის დეპარტამენტის განცხადებით, ნადირობის დროს, გარემოდან გადამფრენი ფრინველების ამოღებაზე დაწესებული მოსაკრებლის გადახდის დამადასტურებელი ქვითრის დედნის წარდგენა სავალდებულო აღარ იქნება. შესაბამისი ბრძანება ძალაში მიმდინარე წლის 22 აგვისტოდან შევიდა. აქამდე, მონადირესთვის გადახდის ქვითრის დედანის ქონა აუცილებელი იყო.

დეპარტამენტში განმარტავენ, რომ გარემოსდაცვითი ინფორმაციის მართვის ელექტრონულ სისტემაში (ms.emoe.gov.ge) შეიქმნა და დაინერგა ელექტრონული მოდული ''სახაზინო კოდი — 3033 გარემოდან გადამფრენი ფრინველების ამოღებაზე მოსაკრებლის გადახდის თაობაზე'', რაც გარემოსდაცვითი ზედამხედველობის დეპარტამენტის უფლებამოსილ თანამშრომელს საშუალებას მისცემს, ელექტრონულ სისტემაში მოსაკრებლის გადახდის ფაქტი გადაამოწმოს.

''ვინაიდან მოსაკრებლის გადახდა ხაზინაში შესაძლებელია აისახოს არამყისიერად, მიზანშეწონილად ჩაითვალა, რომ გადახდიდან შვიდი დღის (გადახდის დღის ჩათვლით) განმავლობაში ნადირობის შემთხვევაში, მოქალაქემ თან უნდა იქონიოს შესაბამისი მოსაკრებლის გადახდის დამადასტურებელი დოკუმენტი მატერიალური ან ელექტრონული ფორმით, ხოლო შემდგომში ამის ვალდებულება მას არ ექნება'', — აცხადებენ გარემოსდაცვითო ზედამხედველობის დეპარტამენტში.

მათივე ინფორმაციით, მოსაკრებლის გადახდა საქართველოს ნებისმიერ ბანკშია შესაძლებელი. საქართველოში ნადირობის სეზონი გუშინ, 22 აგვისტოს გაიხსნა.