თამარ ბაჩალიაშვილის ოჯახის ადვოკატი მიხეილ რამიშვილი აცხადებს, რომ გარდაცვლილის ორგანიზმში აღმოჩნდა ერთ-ერთი ძლიერმოქმედი წამლის კვალი, რომლის შუშა და შეფუთვა მანქანაში არ არის. რამიშვილის თქმით, ეს კიდევ ერთხელ ადასტურებს, რომ ბაჩალიაშვილს თავი არ მოუკლავს.

"[მედიკამენტს] ტოქსიკოლოგები ეძახიან ჟარგონულად კონტროლს, რომელიც აბსოლუტრუად ადამიანს თიშავს. ავტომობილშიც კი არ არის აღმოჩენილი არანაირი შუშა, ან რამე ამდაგვარი. ანუ ეს კიდევ და კიდევ იმას ადასტურებს, რომ არანაირ თვითმკვლელობაზე არ არის საუბარი", — განაცხადა რამიშვილმა.

გარდა ამისა, მისი თქმით, მანქანაში იყო ბოთლი, რომელშიც ექსპერტიზამ ორი მედიკამენტის კვალი იპოვა. მათ შორის ერთ-ერთი ისეთი მედიკამენტია, რომელიც რთულად მოსაპოვებელია.

თამარ ბაჩალიაშვილის საქმეში თვის ბოლოდან ჩაერთვებიან უცხოელი ექსპერტები.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.