კომუნიკაციების კომისიამ კავკასუს ონლაინი კიდევ ერთხელ დააჯიმა. ინფორმაციას ამის შესახებ თავად კომისია ავრცელებს და ამბობს, რომ ჯარიმის ოდენობა 270 ათასი ლარია. საქმე ეხება კომპანიის მიერ წილების გასხვისებას.

უწყებაში ამბობენ, რომ კავკასუს ონლაინი კანონით დაკისრებულ ვალდებულებებსა და კომუნიკაციების კომისიის გადაწყვეტილებებს მეათე თვეა არ ასრულებს.

"კავკასუს ონლაინს წილების პირვანდელ მდგომარეობაში დასაბრუნებლად ვადა 20 სექტემბრამდე აქვს, რომლის შეუსრულებლობის შემთხვევაშიც, კომუნიკაციების კომისია გადაწყვეტილების აღსრულებისთვის კანონით გათვალისწინებულ სხვა მექანიზმებსაც განიხილავს", — აღნიშნავენ კომისიაში.

კომისიის ინფორმაციით, ეს უკვე მეექვსე სანქციაა, რომელიც კომპანიის მიმართ გამოიყენეს. უწყებაში ამბობენ, რომ მათი თანხმობის გარეშე წილის გასხვისების გამო, კავსკასუს ონლაინი სამართალდამრღვევად პირველად 2019 წლის 17 ოქტომბერს ცნეს და კანონდარღვევით გასხვისებული წილის პირვანდელ მდგომარეობაში დაბრუნება მოითხოვეს. მათივე ინფორმაციით, ვალდებულების შეუსრულებლობის გამო, კავკასუს ონლაინი 2019 წლის 12 დეკემბერს 30 ათასი ლარით დაჯარიმდა, ხოლო სამართალდარღვევის აღმოუფხვრელობის გამო, 2020 წლის 6 თებერვალს კომისიამ კომპანიას ჯარიმის სახით 90 000 ლარი დააკისრა.

კომისია მიუთითებს, რომ სამართალდარღვევის აღმოსაფხვრელად და წილის გასხვისებამდე არსებულ მდგომარეობაში დაბრუნების ვადა კავკასუს ონლაინს 22 თებერვლამდე ჰქონდა, თუმცა მისი მხრიდან ვალდებულება მაშინაც არ შესრულებულა და მარტსა ივნისში მას 270 000 ლარიანი ჯარიმა ორჯერ დააკისრეს.

მიმდინარე წლის 17 ივლისს პარლამენტმა მესამე მოსმენით, 88 ხმით არც ერთის წინააღმდეგ, ელექტრონული კომუნიკაციების შესახებ სადავო კანონპროექტი დაამტკიცა. პროექტი პარლამენტში დაჩქარებული წესით განიხილეს.

ცვლილებების თანახმად, თუ კომისიის მიერ ავტორიზებული/ლიცენზიის მფლობელი პირისათვის დაკისრებული ჯარიმები ვერ უზრუნველყოფს კომისიის გადაწყვეტილების აღსრულებას, კომისია უფლებამოსილია დანიშნოს სპეციალური მმართველი, რომელიც აღასრულებს კომისიის გადაწყვეტილებას. ამავე კანონპროექტით, კომისიას მმართველის დანიშვნა 2-წლიანი ვადით შეუძლია და ის ანგარიშვალდებული მხოლოდ კომისიის წინაშეა.

არსებობს მოსაზრება, რომ ეს ცვლილებები სწორედ კავკასუს ონლაინისთვის მიიღეს.

ოპოზიციაში ახალ კანონს საშიშს უწოდებენ და აღნიშნავენ, რომ ეს ბიზნესს დააზარალებს და ინვესტიციებს შეამცირებს. ცვლილებებს არ იზიარებენ არც სფეროს წარმომადგენლები.

კომუნიკაციების კომისიის ხელმძღვანელი კახა ბექაური კი ამბობს, რომ სახელმწიფოს ვალდებულებაა, დაიცვას ქვეყნის უსაფრთხოება და მომხმარებლების უფლებები, ამისთვის კი აღსრულების ეფექტური მექანიზმია საჭირო.