შაქარაშვილის საქმეზე 6 არასრულწლოვნის საქმეზე სხდომის დასრულების შემდეგ, ზ.ხ-ს ადვოკატმა, გიორგი გელხაურმა განაცხადა, რომ ბრალდებულები შიმშილობის გამო "დასაჯეს" და მათ კამერებიდან ტელევიზორები წაართვეს. მისი თქმით, უკვე სამი არასრულწლოვანი შიმშილობს: ზ.ხ, ლ. შ და ა.ქ., აქედან ორს, ზ.ხ-სა და ლ.შ.-ს კამერებიდან ტელევიზორები წაართვეს.

"მივმართავ სახალხო დამცველს, მივმართავ ყველა იმ დაინტერესებულ პირს, რომელიც ამ საქმეშია ჩართული მიაქციეთ ყურადღება ამ მართლმსაჯულებასა და სასამართლოს. საერთოდ არ ხდება არასრულწლოვნის ინტერესების გათვალისწინება. დღეს ზ.ხ-მ განაცხადა, რომ როდესაც მან დაიწყო შიმშილობა მას კამერიდან წაართვეს ტელევიზორი, დასჯის მიზნით, რომ ვინაიდან მან შინშილობა გამოაცხადა მას არ ეკუთვნის რომ უყუროს ტელევიზორს. მივმართავ იუსტიციის მინისტრს, მიაქციეთ ამ ბავშვებს ყურადღება და გაითვალისწინეთ მათი ინტერესები", — განაცხადა გელხაურმა.

საქმის პროკურორის, დავით ყაზარაშვილი აღნიშნულს არ ადასტურებს. მისი თქმით, სჯერა, აღნიშნულს არავინ გააკეთებდა. მან ასევე, ისაუბრა 3 არსრულწლოვნის გადაწყვეტილებაზე, რომ იშიმშილონ და განაცხადა, რომ ეს ბრალდებულთა პროტესტის გამოხატვის ფორმაა.

"რაც შეეხება შიმშილობას, ეს არის ადამიანის პროტესტი, ის ასე გამოხატავს საკუთარ პროტესტს, შესაბამისად, ჩვენი პოზიცია არ იყო და არ გვიიძულებია, რომ ეშიმშილათ. რაც შეეხება ტელევიზორს, ჩემთვის აღნიშნული არ არის ცნობილი და მე მჯერა, რომ მათ ტელევიზორს არავინ ჩამოართმევდა. შიმშილობა არ ნიშნავს ადამიანის რაიმე სახით შეზღუდვას. მას მიეწოდება იმ მოცულებით სასმელი და საჭმელი რაც აქამდე. ასევე, ინფორმაციაც იმ მოცულობით უნდა მიეწოდებოდეს და მიეწოდება რაც აქამდე", — განაცხადა პროკურორმა.

სხდომის შემდეგ ადვოკატებმა განაცხადეს, რომ სასამართლო პროცესები ყოველდღიურ რეჟიმში ჩაინიშნა. ზ.ხ-ს ადვოკატმა ეს შეაფასა, როგორც გადაწყვეტილება, სადაც "არცერთი არასრულწლოვნის საუკეთესო ინტერესები გათვალისწინებული არ არის".

მომდევნო სასამართლო პროცესი, ხვალ, 21 აგვისტოს 11 საათზე არის ჩანიშნული. დღევანდელ სხდომაზე ადვოკატებმა შესავალი სიტყვა წარმოთქვეს.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც-ს; ლ.შ-ს; ნ.ქ-ს და გ.მ-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ-ს და ა.ქ-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა