ბრედ პიტი და ჯენიფერ ენისტონი 2001 წლის შემდეგ პირველად გამოჩნდებიან ეკრანზე ერთად.

მსახიობები 5 წელი იყვნენ დაქორწინებულები და 2005 წელს დაშორდნენ. განქორწინებიდან თითქმის ორი ათწლეულის შემდეგ ისინი ერთად მუშაობას კვლავ დათანხმდნენ.

ორივე მსახიობი ქველმოქმედებისთვის Fast Times at Ridgemont High-ის სცენარის წაკითხვაში მიიღებს მონაწილეობას.

ისინი მონაწილეობენ დეინ კუკის Feelin’ A-Live საქველმოქმედო პროექტში, რომელიც თანხას აგროვებს მსახიობ შონ პენის მიერ შექმნილი სასწრაფო დახმარების ორგანიზაცია CORE-სთვის.

ფოტო: Warner Bros.

ენისტონსა და პიტს 1982 წლის ფილმის მხატვრულ წაკითხვაში ჯულია რობერტსი, მორგან ფრიმენი და მეთიუ მაკკონაჰი შეუერთდებიან.

"ვფიქრობ, ჯენიფერ ენისტონი ჩინებული ადამიანია და ის პირველი იყო, ვინც თქვა 'თანახმა ვარ', შემდეგ კი მალევე ახალ-ახალი ხალხი შემოგვემატა", — თქვა კომიკოსმა კუკმა Extra-სთან საუბრისას.

წყვილი ბოლოს ეკრანებზე ერთად Friends-ის 2001 წლის საკულტო ეპიზოდში, თითქმის ორი ათწლეულის წინ, ვიხილეთ. ამ დროს ენისტონი და პიტი დაქორწინებულები იყვნენ, სერიალში კი დიდი ხნის სკოლის მეგობრების როლს ასრულებდნენ.

ამ ამბის პარალელურად ფანები Friends-ის დაბრუნების სპეციალურ ეპიზოდს ელიან, რომელიც კორონავირუსის მიმდინარე პანდემიის გამო უკვე არაერთხელ გადაიოდი.

ფოტო: Warner Bros.

ცოტა ხნის წინ ენისტონმა Deadline-ს განუცხადა, რომ გლობალური პანდემიის გამო მეგობრების დაბრუნება კიდევ ერთხელ გადაიდო.

სპეციალური ეპიზოდის გამოშვება თავდაპირველად მაისში იგეგმებოდა, რათა 27 მაისს HBO Max-ის გაშვებას დამთხვეოდა. კორონავირუსის გამო გადაღებების შეჩერების შემდეგ გამოსვლის ახალ თარიღად 17 აგვისტო დასახელდა.

ამ თარიღმა უკვე ჩაიარა, ენისტონმა კი დაადასტურა, რომ ახალი თარიღი ჯერ არ შერჩეულა.

სპეციალურ ეპიზოდში დაბრუნდებიან სერიალის მსახიობები ენისტონი (რეიჩელი), კორტნი კოქსი (მონიკა), ლიზა კუდროუ (ფიბი), დევიდ შვიმერი (როსი), მეთიუ პერი (ჩენდლერი) და მეტ ლებლანკი (ჯოუი).