ბელარუსიის პრეზიდენტ ალექსანდრ ლუკაშენკოსა და 31 მაღალჩინოსანს ლიეტუვაში შესვლა აუკრძალეს. ადგილობრივი გამოცემის, Delfi-ს ინფორმაციით, გადაწყვეტილება საგარეო საქმეთა მინისტრმა, ლინას ლინკავიჩუსმა გააჟღერა.

მისი განმარტებით, სიაში მოხვდნენ ბელარუსიის ომონისა და კაგებეს ხელმძღვანელი პირები. ლინკევიჩუსის განცხადებით, საბოლოო გადაწყვეტილებას სანქციების დაწესების შესახებ შინაგან საქმეთა სამინისტრო მიიღებს.

"გულახდილად რომ ვთქვათ, საქნციები ჩვენგან სიმბოლურ ხასიათს უფრო ატარებს, რადგან გადამწყვეტი მნიშვნელობა ექნება ევროკავშირის სანქციებს, თუმცა ამის გაკეთება მაინც შეგვიძლია", — განაცხადა მან.

შეგახსენებთ, რომ სპეციალურ სამიტზე ევროკომისიამ გადაწყვიტა სანქციები დაუწეროს ლუკაშენკოს რეჟიმს. ისინი არ აღიარებენ საპრეიზდენტო არჩევნების შედეგებს და ბელარუსი ხალხის მხარდასაჭერად 53 მილიონი გამოყეს.

გაიგეთ მეტი: რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.