მინსკში მიმდინარე აქციაზე მესამე ადამიანი გარდაიცვალა. ბელარუსის შინაგან საქმეთა სამინისტროს ცნობით, შემთხვევა 16 აგვისტოს დილის 3:20 წუთზე მოხდა და მას ავტოსაგზაო შემთხვევას უკავშირებს. უწყების ოფიციალურ ტელეგრამ არხზე გამოქვეყნდა ინფორმაცია, რომლის თანახმადაც 19 წლის ახალგაზრდის, არტიომ პარუკოვის გარდაცვალება უბედური შემთხვევა იყო. იქვე აღნიშნულია, რომ ახალგაზრდა მანქანის სავალ გზაზე იდგა, როცა რენოს მარკის ავტომობილი დაეჯახა. ქვეითი შემთხვევის ადგილზე გარდაიცვალა.

გარდაცვლილის ოჯახს უწყების მიერ გავრცელებული ოფიციალური ინფორმაციის არ სჯერა. ევრორადიოს ცნობით, პარუკოვის ნათესავი ამბობს, რომ:

"იმ მომენტში არტიომი არაფერში მონაწილეობდა, უბრალოდ, სახლში ბრუნდებოდა. რატომღაც, მას მოუწია გადასულიყო იმ ქუჩის საპირისპირო მხარეს, სადაც ჩვენი სახლი მდებარეობდა. საფეხმავლო გზა სულ ახლოსაა, რატომ არ წამოვიდა იმ გზით? ვფიქრობთ, რომ მანქანა მაშინ დაეჯახა, როცა ვიღაცისგან გაქცევას ცდილობდა".

ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ნაწილი პოლიციამ დააკავა. არტიომ პარუკოვი მესამე ადამიანია, ვინც ბელარუსში მიმდინარე აქციებს ემსხვერპლა.