თბილისი ენერჯის განცხადებით, სავაჭრო ცენტრი სითი მოლი აფეთქებას გადაურჩა. მათი ინფორმაციით, შენობის ერთ-ერთ სამზარეულოში ღია მდგომარეობაში დატოვებული იყო გაზქურის 8 სანთურა.

მათივე ცნობით, ცხელ ხაზზე შევიდა შეტყობინება, რომ ქავთარაძის 1 ნომერში მდებარე სავაჭრო ცენტრში ძლიერი გაზის სუნი იდგა, რის შემდეგაც თბილისი ენერჯის სწრაფი რეაგირების ჯგუფი ადგილზე მივიდა. თბილისი ენერჯის განცხადებით, აღნიშნულმა ჯგუფმა ლაზერული აპარატით შემოწმებისას გაზის მაღალი კონცენტრაცია დააფიქსირა. ადგილზე მობილიზებული იყო სახანძრო სამაშველო, სასწრაფო დახმარებისა და პოლიციის ეკიპაჟები. ასევე, სპეციალისტებმა უსაფრთხოების მიზნით ობიექტს გაზმომარაგება შეუწყვიტეს.

თბილისი ენერჯი მოქალაქეებს მოუწოდებს იყვნენ ფრთხილად და საქმეს მოეკიდონ პასუხისმგებლობით.

"მუდამ შეამოწმეთ გაზის დანადგარები, რათა თავიდან ავირიდოთ უბედური შემთხვევები, რომელიც სამწუხაროდ ხშირად ადამიანების სიკვდილით მთავრდება", — წერია განცხადებაში.