შინაგან საქმეთა სამინისტროს ინფორმაციით, ბაუჰაუს ბარიდან გაუჩინარებული ბიჭის ცხედარი მტკვარში იპოვეს.

უწყების განცხადებით, ბაუჰაუს ბარიდან 2 ახალგაზრდის გაუჩინარების შესახებ შეტყობინება 15 აგვისტოს, დაახლოებით 21:00 საათზე შევიდა და ახალგაზრდების ადგილსამყოფელის დადგენის მიზნით, ინტენსიურ რეჟიმში დაიწყო შესაბამისი საძიებო ღონისძიებები.

"საქმეზე უკვე ჩატარდა სხვადასხვა სახის საგამოძიებო მოქმედებები, მათ შორის, გამოკითხული არიან ბაუჰაუს ბარის თანამშრომლები, დაკარგული ახალგაზრდების ოჯახის წევრები, მეგობრები და საქმესთან შემხებლობაში მყოფი სხვა პირები. დაინიშნა შესაბამისი ექსპერტიზები", — აცხადებენ შსს-ში.

ფაქტთან დაკავშირებით გამოძიება 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.

რამდენიმე საათით ადრე საგანგებო სიტუაციების მართვის სამსახურის თანამშრომლებმა მტკვარში ახალგაზრდა ქალის ცხედარიც იპოვეს, რომელიც ასევე ბაუჰაუსიდან დაიკარგა.