საქპატენტის ერთ-ერთი დეპარტამენტის უფროსი, ირაკლი კასრაძე მისივე სამსახურის ხელმძღვანელს უკანონო დავალებების მიცემაში ადანაშაულებს. მან მინდია დავითაძის ქმედებების შესწავლის მოთხოვნით პროკურატურას განცხადებით 30 ივლისს მიმართა.

On.ge დაუკავშირდა ირაკლი კასრაძეს, რომელიც საქპატენტში სასაქონლო ნიშნების, გეოგრაფიული აღნიშვნების და დიზაინის დეპარტამენტის უფროსის თანამდებობას იკავებს. იგი აცხადებს, რომ მან საქპატენტის ხელმძღვანელისგან მიიღო უკანონო დავალება, რომლის მიხედვით პრობლემები უნდა შეექმნა გაერთიანებული ოპოზიცია ძალა ერთობაშიასა და მთავარი არხის სასაქონლო ნიშნის რეგისტრაციისთვის. მისივე განმარტებით, მას შემდეგ, რაც ამ დავალების შესრულებაზე უარი განაცხადა, ბაზაზე წვდომა შეუზღუდეს და უფუნქციოდ დატოვეს.

როგორც ირაკლი ჰყვება, თავდაპირველად მიმდინარე წლის მაისში ხელმძღვანელისგან მიიღო დავალება, რომ მიეწოდებინა ინფორმაცია ყველა ოპოზიციური პარტიისა და მათთან დაკავშირებული პირების სასაქონლო ნიშნების შესახებ. მისი თქმით, ამ დროს ამგვარი ორი მიმდინარე განაცხადი იყო: გაერთიანებული ოპოზიცია ძალა ერთობაშიას და მთავარი არხის სასაქონლო ნიშნის რეგისტრაციის შესახებ.

"მთხოვა, რომ მიმეთითებინა აბსოლუტურად ყველა მონაცემი ამ სასაქონლო ნიშნებზე: განმცხადებელი ვინ არის, როდის უწევდა რეგისტრაცია, განაცხადის კლასი და ა.შ." , — აცხადებს კასრაძე.

მისივე თქმით, მეორე დღეს, მან 21 მაისს გაერთიანებული ოპოზიციის სასაქონლო ნიშანი დაარეგისტრირა, რის გამოც მინდია დავითაძემ დაიბარა და უთხრა, რომ თუ მთავარი არხის ნიშანზეც იგივე განმეორდებოდა, საკადრო ცვლილებები შეეხებოდა.

"დამიბარა და მითხრა, ამ ოპოზიციის ნიშანზე ზემოდან ძაან მაკაჩავეს და მთავარის ნიშანზეც იგივე თუ განმეორდება, მაშინ საკადრო ცვლილებები მომიწევს შენთან მიმართებაშიო", — უყვება კასრაძე On.ge-ს.

მისი თქმით, ამის შემდეგ ხელმძღვანელმა მოთხოვა, რომ ძალა ერთობაშიას ნიშანთან დაკავშირებით სააპელაციო პალატაში საჩივარი შეეტანა და ნიშნის რეგისტრაციისთვის პრობლემა შეექმნა, რაზეც მან უარი უთხრა. ირაკლი ამბობს, რომ საპასუხოდ დავითაძემ ახალ დეპარტამენტში გადასვლა მოსთხოვა, რაზეც ასევე უარი მიიღო.

"27 ივლის დამიბარა და მითხრა, რომ ვაკეში უნდა გადაგიყვანოო. ჩვენ ძირითად ოფისში, მცხეთაში ვართ. ვაკეში არის ახალი დეპარტამენტი, მოქალაქეთა მომსახურება, კანცელარია, ცხელი ხაზი და სხვა. მე ვუთხარი, რომ არ ვთვლიდი მიზანშეწონილად იქ გადასვლას.

მეუბნება, საკადრო პოლიტიკას მე განვსაზღვრავო. მე ვუთხარი, შენ არ განსაზღვრავ, კანონით ვარ დანიშნული-მეთქი. თუ გინდა გაშვება, შემიწყვიტე ხელშეკრულება ცალმხრივად და გავასაჩივრებ-მეთქი. მიპასუხა, არა, მე მაგის ჩიტი არ ვარ, ვიცი როგორც უნდა გემუშავოო", — ამბობს კასრაძე On.ge-სთან.

ის ჰყვება, რომ სწორედ ამის შემდეგ ბაზაზე წვდომა გამოურთეს და უფუნქციოდ დატოვეს, მისი უფლებამოსილება კი სხვას გადააბარეს, რასაც კასრაძე უკანონობას უწოდებს. მან გენერალურ პროკურატურას მიმართა და ხელმძღვანელის ქმედებების კანონიერების შესწავლა მოითხოვა, თუმცა, მისი ინფორმაციით, საგამოძიებო უწყება ამ საქმით მას შემდეგ დაინტერესდა, რაც მთავარი არხის ეთერში რეპორტაჟი გავიდა. გამოკითხვაზე კასრაძე გუშინ, 13 აგვისტოს იმყოფებოდა.

"30 ივლისს მივმართე გენერალურ პროკურატურას და მოვითხოვე მისი ქმედებების შესწავლა. ვთვლი, რომ არის უფლებამოსილების ბოროტად გამოყენება და სამსახურეობრივი მოვალეობის შესრულებაში ხელის შეშლა.

მიმართვის ამბავი ამათთვის ცნობილი რომ გახდა, 4 დღეში, 3 აგვისტოს ჩემი მოვალეობის უკანონო შემსრულებელს დაარეგისტრირებინეს მთავარი არხის ნიშანი, რომელზეც მანამდე ითხოვდა პროცესის გაწელვას", — აცხადებს კასრაძე.

ირაკლი კასრაძემ მიმართა სახალხო დამცველსაც. On.ge-ს ომბუდსმენის აპარატში უთხრეს, რომ საქმის შესწავლა უკვე დაიწყეს.

On.ge საქპატენტსაც დაუკავშირდა, სადაც რამდენიმე დღის წინ მათ მიერ გავრცელებულ განცხადებაზე მიგვითითეს და გვითხრეს, რომ ამით ვიხელმძღვანელოთ. ეს განცხადება უწყებამ მას შემდეგ გაავრცელა, რაც მთავარმა არხმა ირაკლი კასრაძის შესახებ სიუჟეტი მოამზადა. უწყებაში ირწმუნებიან, რომ სასაქონლო ნიშნის რეგისტრაციის ირგვლივ კასრაძის ქმედებები რეგისტრაციის პროცესის პოლიტიკური მიზნებით შესაძლო გამოყენების შესახებ კითხვებს აჩენდა, ამიტომ საქპატენტის ხელმძღვანელობის გადაწყვეტილებით, მას ჩამოერთვა მასზე დელეგირებული უფლებამოსილება და მთავარი არხის სასაქონლო ნიშანი კასრაძის გარეშე დარეგისტრირდა.