ლიეტუვის ყოფილი პრეზიდენტი, დალია გრიბაუსკაიტე ბელარუსში მიმდინარე მოვლენებს Twitter-ზე ეხმიანება და ლუკაშენკოს გადადგომისკენ მოუწოდებს.

"დიქტატორო სისხლიანი ხელებით, ლუკაშენკო, ახლავე წადი. შენი ბედი თავადვე გადაწყვიტე — მომავალი ბელარუსში არ გაქვს", — აცხადებს გრიბაუსკაიტე.

9 აგვისტოს ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები გვიან ღამით მას შემდეგ დაიწყო, რაც წინასწარი დათვლის შედეგად ცნობილი გახდა, რომ ხმების უმრავლესობა ალექსანდრ ლუკაშენკომ მიიღო, სვეტლანა ტიხანოვსკაიამ კი 10%.

მინსკში, ქალაქის სხვადასხვა ნაწილში, დემონსტრანტებისა და სპეცდანიშნულების რაზმის შეტაკებებს ჰქონდა ადგილი. ქვეყანაში საგანგებო მდგომარეობა ხმის მიცემის პროცედურის დამთავრებამდე რამდენიმე საათით ადრე ამოქმედდა. დედაქალაქში კი არმიის შეიარაღებული ნაწილები შევიდა. საღამოს ექვსი საათისთვის მინსკის ყველა ცენტრალურ მოედანსა და სამთავრობო შენობასთან სპეციალური კორდონი იდგა, გაჩერდა ქალაქის სატრანსპორტო სისტემა, დაიხურა ქალაქიდან შესასვლელი და გასასვლელი გზები.

ბელარუსის მოქმედი პრეზიდენტი, ალექსანდრე ლუკაშენკო, ქვეყანას 1994 წლიდან მართავს. ლუკაშენკოს ევროპის უკანასკნელ დიქტატორსაც უწოდებენ.