საერთაშორისო რესპუბლიკური ინსტიტუტის (IRI) ახალი კვლევის თანახმად, ილია II-ს, ამირან გამყრელიძეს, გიორგი გახარიას, კახა კალაძეს, დავით ბაქრაძესა და შალვა ნათელაშვილს უფრო მეტი ადამიანი აფასებს დადებითად, ვიდრე ივანიშვილს. კითხვაზე — "რას ფიქრობთ ჩამოთვლილ ქართველ პოლიტიკურ, საჯარო და სასულიერო მოღვაწეებზე", ილია მეორეს დადებითად აფასებს 89%, ხოლო 74% ამირან გამყრელიძეს.

პრემიერმინისტრ გახარიას დადებითად აფასებს 63%, ხოლო კახა კალაძეს — 57%. რაც შეეხება ოპოზიციას, კალაძის შემდეგ დადებითი განწყობებით მოდის დავით ბაქრაძე — 53%, ხოლო შალვა ნათელაშვილს — 42%. 41% აფასებს დადებითად ბიძინა ივანიშვილს. იგივე მაჩვენებელი აქვს გრიგოლ ვაშაძეს, ხოლო გიორგი ვაშაძეს — 40%.

ჩამოთვლილთაგან, ყველაზე უარყოფითად გამოკითხულთა 73% განწყობილია ზურაბ გირჩი ჯაფარიძის მიმართ, 72% კი ეკა ბესელიას მიმართ.

ფოტო: საერთაშორისო რესპუბლიკური ინსტიტუტი

საერთაშორისო რესპუბლიკურმა ინსტიტუტმა (IRI) კვლევები 2020 წლის 4 ივნისისა და 2 ივლისის პერიოდში ჩაატარა. საქართველოს მასშტაბით, შემთხვევითი შერჩევის შედეგად, პირისპირ ინტერვიუს სახით გამოკითხულია 18 წლის და მეტი ასაკის, 1 500 რესპონდენტი. საშუალო ცდომილების ზღვარი +/- 2,5%-ია.