ოკუპირებული აფხაზეთის ე.წ პრეზიდენტმა, ასლან ბჟანიამ, ალექსანდრე ლუკაშენკოს გაპრეზიდენტება მიულოცა. მისალოც ტექსტში წერია, რომ გამარჯვება სანდოა.

"გილოცავთ 2020 წლის 9 აგვისტოს არჩევნებში მოპოვებულ დამაჯერებელ გამარჯვებას. მიღებული ხმების რაოდენობა აჩვენებს ხალხის ნდობისა და მხარდაჭერის მაღალ დონეს. ეს არის ბელარუსის რესპუბლიკის სახელმწიფოებრიობის გაძლიერებისა და მისი ეროვნული ინტერესების დაცვის კუთხით თქვენი მიღწევების ცნობა. მიუხედავად ოფიციალური დიპლომატიური ურთიერთობების არარსებობისა, აფხაზეთსა და ბელარუსს აქვთ სხვადასხვა სფეროებში თანამშრომლობის ფართო გამოცდილება, მე ვიმედოვნებ, რომ მომავალში ურთიერთობები გაძლიერდება და სახელმწიფოთაშორისი გახდება", — წერია მილოცვაში.

აღსანიშნავია, რომ ლუკაშენკო საქართველოს ოკუპირებული ტერიტორიების ე.წ. დამოუკიდებლობას არ აღიარებს.

ლუკაშენკოს გამარჯვება მიულოცეს რუსეთის, სომხეთის ყაზახეთის, აზერბაიჯანისა და ჩინეთის პრეზიდენტებმაც.

ბელარუსის ცესკოს მონაცემებით, ლუკაშენკომ 80,23 პროცენტი მიიღო, ხოლო მისმა მთავარმა კონკურენტმა, სვეტლანა ტიხანოვსკაიამ — 9,9 პროცენტი.

მინსკში მოქალაქეებსა და პოლიციას შორის იყო შეტაკებებიც. საბოლოოდ, აქცია რეზინის ტყვიებითა და წყლის ჭავლით დაშალეს. უფლებადამცველი ორგანიზაციების განცხადებით, აქციაზე გარდაიცვალა ერთი პირი, რომელსაც პოლიციის სატვირთომ გადაუარა. აღნიშნულ ინფორმაციას უარყოფენ შინაგან საქმეთა სამინისტროში. ამასთან, ორგანიზაციები აცხადებენ, რომ სულ მცირე 120 პირი დააკავეს.

მასობრივი არეულობისა და სამართალდამცავების მიმართ ძალადობის საქმეზე გამოძიება დაიწყო.

ბელარუსში საპროტესტო გამოსვლები არჩევნების შედეგების გაუქმების მოთხოვნით ისევ გრძელდება.