ცეცხლის შეწყვეტის შეთანხმების მიუხედავად, ალეპოს აღმოსავლეთით, მეამობოხეთა მიერ კონტროლირებადი ტერიტორიის დაბომბვა მაინც გრძელდება. ცეცხლის შეწყვეტის პერიოდში, ათასობით მშვიდობიან მოქალაქესა და ამბოხებულს ქალაქიდან გასვლის საშუალება უნდა ჰქონოდა. ამის შესახებ The Associated Press იუწყება.

AP-ის ცნობით, დაგეგმილი ევაკუაცია გადაიდო. სამთავრობო ავტობუსები ქალაქში ჩავიდნენ, თუმცა, საწყობებში დაბრუნდნენ, რაც იმას ნიშნავს, რომ შეთანხმება არ შესრულდა.

ალეპოელი მედია აქტივისტი, მუჰამედ რასლანი იუწყება, რომ დღეს დილით, ადგილობრივი დროით 10:15-ზე, მაშინ, როდესაც ერთ-ერთი თურქული სააგენტოსთვის მუშაობდა, მასთან ახლოს რაკეტა ჩამოვარდა.

სირიის ადამიანის უფლებების ობსერვატორიის ცნობით, იმავე დროს, აფეთქების ხმა გაისმა ამბოხებულების მიერ კონტროლირებადი უბნიდანაც.

სირიის ოპოზიციური ძალები აცხადებენ, რომ ალეპოში ევაკუაცის გეგმა ირანელმა მებრძოლებმა დაარღვიეს და მათ განაახლეს თავდასხმები ქალაქის იმ ნაწილში, სადაც ამბოხებულები არიან.

შიიტები ლიბანიდან, ერაყიდან, ირანიდან და ავღანეთიდან, პრეზიდენტ ასადის დასახმარებლად იბრძვიან სირიაში.

BBC-ის ცნობით, თურქეთის საგარეო საქმეთა მინისტრი მიმართავს რუსეთსა და ირანს, უზრუნველყონ ცეცხლის შეწყვეტის შეთანხმების შესრულება.

ამავე დროს, რუსეთმა ამბოხებულებს დასდო ბრალი შეთანხმების დარღვევაში.

რუსეთის თავდაცვის სამინისტრომ განაცხადა, რომ ალყაშემორტყმულ ალეპოში მყოფმა სირიელმა ამბოხებულებმა დაარღვიეს ცეცხლის შეწყვეტის შეთანხმება.

სამინისტროს მიერ გავრცელებული განცხადების მიხედვით, ამბოხებულებმა გამთენისას განაახლეს საომარი მოქმედებები. კოლონას კი, რომელიც დილის საათებში უნდა დაძრულიყო ქალაქ იდლიბისკენ და გადაეყვანა მოსახლეობა, ცეცხლი გაუხსნეს.

ალეპოში მყოფი აქტივისტი და ჟურნალისტი, სალაჰ აშკარი ტვიტერზე წერს, რომ მის შენობას სამთავრობო ძალებმა გაუხსნეს ცეცხლი. მისი თქმით, ადამიანები, რომლებიც ევაკუაციისთვის ავტობუსებს ელოდებოდნენ, ისევ უნდა დაბრუნდნენ თავშესაფრებში.

13 დეკემბერს გაერომ განაცხადა, რომ სირიის მთავრობის ჯარისკაცები აღმოსავლეთ ალეპოში სახლებში შედიან და მოქალაქეებს კლავენ, მათ შორის ქალებსა და ბავშვებს:

"გუშინ საღამოს ჩვენ საშინელი ცნობები მივიღეთ ალეპოდან, ქუჩებში უამრავი გვამია" - აცხადებს გაეროს წარმომადგენელი.

მეამბოხეები, რომლებიც ალეპოს აღმოსავლეთში ბოლო 4 წლის განმავლობაში იმყოფებიან, განადგურების ზღვარზე არიან.

გაერო და წითელი ჯვარი სირიის მთავრობისგან და რუსეთისგან ალეპოში მოქალაქეების დაცვას ითხოვენ.

რა ხდება სირიაში? - მოკლედ