დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს პრემიერმინისტრის, გიორგი გახარიას განცხადებით, მედიით გავრცელებული ინფორმაცია, რომ ყაზბეგში შეზღუდვების დაწესება იგეგმება, სიმართლეს არ შეესაბამება.

"ვრცელდება რაღაც ჭორები, რომ მთავრობა აპირებს ყაზბეგში შეზღუდვების დაწესებას, მაგრამ არანაირი რისკი არ არსებობს. დღეს ყაზბეგში, ისევე როგორც ლარსის გამშვებ პუნქტზე ეპიდემიოლოგიური მდგომარეობა სრულად კონტროლდება, ამიტომ ეს არის მხოლოდ ჭორები და არავინ არ აპირებს ყაზბეგში რაიმე სახის შეზღუდვების დაწესებას", — განაცხადა პრემიერმა.

დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, ერთი ჯგუფი ყაზბეგში უკვე წასულია და მისივე ცნობით, იქ სიტუაცია კონტროლირებადია.

"საბედნიეროდ, იქ მათ ბევრი კონტაქტები არა აქვთ ადგილობრივებთან, მაგრამ მიმდინარეობს ყველა კონტაქტის გამოკვლევა და დღეს ჩამოვა იქიდან გამოკვლევისთვის აღებული ნაცხები", — აღნიშნა იმნაძემ.

შინაგან საქმეთა სამინისტროს განცხადებით, ბოლო დღეებში ჩატარებული კვლევებით მათ 11 თანამშრომელს კორონავირუსი დაუდგინდა. უწყების ინფორმაციით, აქედან 7 შემთხვევა საპატრულო პოლიციის დეპარტამენტის საზღვრის მართვისა და კოორდინირების მთავარი სამმართველოს თანამშრომლებში დაფიქსირდა.

3 შემთხვევა მესტიის მუნიციპალიტეტში გამოუვლინდა მეხანძრე-მაშველს, დაცვისა და სასაზღვრო პოლიციის თანამშრომელებს. ამასთან, კორონავირუსი თბილისში დაცვის პოლიციის ერთ ინსპექტორს გამოუვლინდა.

12 აგვისტოს მონაცემებით, საქართველოში კორონავირუსის 14 ახალი შემთხვევა გამოვლინდა, 4 ადამიანი კი გამოჯანმრთელდა.

ჯამში, დადასტურებულ შემთხვევათა რაოდენობა 1 278-მდე გაიზარდა, მათ შორის, გამოჯანმრთელებულია 1058 ადამიანი, გარდაცვლილი — 17. კარანტინის რეჟიმში 7 718 პირი რჩება, სტაციონარში მეთვალყურეობის ქვეშ კი 245 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: