საქართველოს პრემიერმინისტრი ადამ კინზინგერის განცხადებას გამოხემაურა, სადაც მან საქართველოს ნატოში შესვლაზე ისაუბრა. გახარიას თქმით, მსგავსი განცხადებები ბოლო დროს სტრატეგიულ პარტნიორებთან ურთიერთობების გაღრმავების შედეგია.

"მიუხედავად ბრალდებებისა, სპეკულირებისა ქვეყნის ბედით და კერძო, პერსონალური პოლიტიკური ინტერესებისგან გამომდინარე მომავლით სპეკულირებისა, ვახერხებთ და ვაღრმავებთ პარტნიორობას ძირითად სტრატეგიულ მიმართულებებზე, როგორიცაა NATO, აშშ, ევროკავშირი. ამ მიმართულებით, სპეკულაციების მიუხედავად, საქართველოს და ჩვენს სტრატეგიულ პარტიონორებს შორის ურთიერთობას არანაირი საფრთხე არ ემუქრება. პირიქით, ამ ბოლო წლების განმავლობაში გახდა ისეთი, როგორიც არ ყოფილა არასდროს, სწორედ ამის შედეგია მსგავსი განცხადებებიც. დღეს საქართველო სრულად არის მზად წევრობისთვის, ამას ხედავენ და აფასებენ ჩვენი პარტნიორებიც. ეს პროცესია, ჩვენ ამ მიზანს მივაღწევთ. ყველას უნდა გვახსოვდეს, საქართველოს ევროატლანტიკური ინტეგრაცია და მისი მშვიდობიანი განვითარება არის აუცილებელი წინაპირობა ქვეყნის ტერიტორიული მთლიანობის აღდგენისთვის" — განაცხადა გახარიამ.

ამერიკელმა კონგრესმენმა, საქართველოს მეგობართა ჯგუფის თანათავმჯდომარე ადამ კინზინგერმა გუშინ, 7 აგვისტოს თქვა, რომ დრო დადგა საქართველო ნატო-ს სრულუფლებიანი წევრი გახდეს.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.