ევროპული საქართველოს წევრები მუხთგვერდის ძმათა სასაფლაოზე იმყოფებოდნენ. პარტიის ერთ-ერთი ლიდერის, დავით ბაქრაძის განცხადებით, ისინი პატივს მიაგებენ, ვინც სიცოცხლე შესწირა საქართველოს თავისუფლების დაცვას.

"ეს არის ასევე დიდი პასუხისმგებლობის გააზრების დღე, ყველამ უნდა გავიაზროთ, რომ მიუხედავად შიდა უთანხმოებისა, უნდა შევძლოთ ერთად დადგომა და შრომა, როდესაც საქმე ქვეყნის მთავარ ღირებულებებს ეხება, როგორიცაა ოკუპაციის დასასრული", — თქვა დავით ბაქრაძემ.

მისივე განცხადებით, ოკუპაცია დღესაც გრძელდება, ამიტომ საქართველოს მოქალაქეებმა საერთო ენის გამონახავა უნდა შეძლონ. ბაქრაძემ გამოთქვა იმედი, რომ მიუხედავად განსხვავებებისა, ქართველები ერთად დადგომას მოახერხებენ "იმ უბედურებასთან გასამკლავებლად", რაც რუსეთის ოკუპაციამ მოუტანა საქართველოს.

"დარწმუნებული ვარ, რომ საქართველო იქნება ერთიანი, დაცული და ევროპული ქვეყანა", — აღნიშნა მან.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.