საქართველოს გენერალურმა პროკურატურამ საერთაშორისო სამართლებრივი დახმარების ფარგლებში აშშ-ში ფეისბუქის, ინსტაგრამისა და გუგლის ადმინისტრაციას მიმართა, თამარ ბაჩალიაშვილის ანგარიშებზე მონაცემების შენახვის მოთხოვნით. ამის შესახებ გენერალური პროკურატურა განცხადებას ავრცელებს.

"24 ივლისს საქართველოს გენერალურმა პროკურატურამ საერთაშორისო სამართლებრივი დახმარების ფარგლებში, აშშ-ში კომპანია ფეისბუქის ადმინისტრაციას მიმართა თამარ ბაჩალიაშვილის ფეისბუქ მონაცემების შენახვის მოთხოვნით.

27 ივლისს საქართველოს გენერალურმა პროკურატურამ კომპანია ფეისბუქის ადმინისტრაციას ასევე მიმართა თამარ ბაჩალიაშვილის ინსტაგრამ მონაცემების შენახვის მოთხოვნით.

27 ივლისს საქართველოს გენერალურმა პროკურატურამ აშშ-ში კომპანია გუგლის ადმინისტრაციას მიმართა თამარ ბაჩალიაშვილის გუგლის მომსახურებების (ელექტრონული ფოსტა, ინტერნეტში შესვლის ისტორია, იუთუბი) მონაცემების შენახვის მოთხოვნით", — წერია პროკურატურის მიერ გავრცელებულ განცხადებაში.

უწყების ინფორმაციით, 5 აგვისტოს, გენერალურმა პროკურატურამ საერთაშორისო სამართლებრივი დახმარების ფარგლებში ამერიკის შეერთებული შტატების იუსტიციის დეპარტამენტს მიმართა ფეისბუქ და ინსტაგრამ მომხმარებლის შინაარსობრივი მონაცემების მოპოვების შუამდგომლობით. გამოთხოვილი მონაცემები მოიცავს 1 თებერვლიდან 30 ივლისის ჩათვლით პერიოდს.

განცხადების მიხედვით, საქართველოს პროკურატურა მზაობას გამოთქვამს, მომავალშიც საჭიროების შემთხვევაში, მიმართოს პარტნიორი ქვეყნების საგამოძიებო უწყებებს და უცხო სახელმწიფოს შესაბამის საექსპერტო დაწესებულებებს საქმისთვის მნიშვნელოვანი მტკიცებულებების მოპოვების თხოვნით.

დღეს, 6 აგვისტოს, თამარ ბაჩალიაშვილის ოჯახი და ადვოკატი გენერალურ პროკურორს, ირაკლი შოთაძეს შეხვდნენ. უწყების დატოვების შემდეგ თამარ ბაჩლიაშვილის დედამ, თეონა თამაზაშვილმა განაცხადა, რომ ამ შეხვედრის მერე საქმეში FBI ჩაერთვება. მისივე თქმით, გენერალური პროკურორი, ირაკლი შოთაძე შეჰპირდა, რომ ხელს არავის დააფარებენ და ვინც არ უნდა იყოს, გამოააშკარავებენ.