ზუგდიდი-თბილისის მიმართულებით მოძრავ ავტობუსს უცნობი ადამიანები თავს დაესხნენ და ქვა ისროლეს, რის შედეგადაც ერთი მგზავრი დაშავდა. ინფორმაციას ამის შესახეხებ თვითმხილველი Facebook-ზე ავრცელებს შემთხვევა გუშინ ღამე, ხობში, სოფელ ქვალონთან მოხდა.

შემთხვევის შედეგად დაზიანებულია სატრანსპორტო კომპანია გლობუსის ავტობუსი. კომპანიის წარმომადგენლების თქმით, ეს თავდასხმის უკვე მეორე შემთხვევაა. ისინი მოტივად კონკურენტი სატრანსპორტო კომპანიის მხრიდან შურისძიებას ასახელებენ.

"მიზანმიმართული იყო, იყო გამიზნული მძღოლზე, რომ მძღოლი დაბნეულიყო და მომხდარიყო ავტოსაგზაო შემთხვევა. მიჰყავდა 30 კაცი და 30-ვე ადამიანს ემუქრებოდა საფრთხე. რა თქმა უნდა, კონკურენციაა, ჩვენი ავტობუსები არის გამართული, მოწესრიგებული ავტობუსები. ჩვენს კონკურენტებს არ აწყობთ, ამიტომ მიდის ჩვენზე თავდასხმა, ეს არის მეორედ მომხდარი ფაქტი უკვე", — ამბობს ავტოსატრანსპორტო კომპანიის წარმომადგენელი მთავარ არხთან.

On.ge დაუკავშირდა შინაგან საქმეთა სამინისტროს, სადაც გვითხრეს, რომ გამოძიება სისხლის სამართლის კოდექსის 187-ე და 276-ე მუხლით მიმდინარეობს, რაც სხვისი ნივთის დაზიანებას და ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს. შსს-ს ცნობით, საქმეზე დაკავებული არავინ არ არის.