კახა კალაძის განცხადებით, მერიის მიდგომა კერძო ავტომობილებთან ბრძოლა არ არის და მიზანი მიმართულებების საზოგადოებრივ ტრანსპორტთან გადანაწილებაა. ამის შესახებ მან ჭავჭავაძის გამზირის შესახებ საუბრისას, თბილისის მთავრობის სხდომაზე განაცხადა.

"ზოგადად, ჩვენი მიდგომა და დამოკიდებულება არ არის ის, რომ ჩვენ ვებრძვით კერძო ავტომობილებს. ეს ასე არ უნდა გაიგოს არავინ. მეც მყავს კერძო ავტომობილი, მეც მყავს ჯიპი. მე თავად გადავაადგილდები, მაგრამ, კიდევ ერთხელ ვიმეორებ, ეს არ ნიშნავს იმას, რომ ჩვენ ვებრძვით კერძო ავტომობილის მძღოლებს, პირიქით, ამ რეფორმით, ამ პროექტით ყველას თანაბრად გადაუნაწილდება მიმართულებები", — განაცხადა კალაძემ.

მისივე თქმით, რეფორმა სხვა ქუჩებსაც შეეხება და ჭავჭავაძის გამზირი გამონაკლისი არ იქნება.

მან ასევე აღნიშნა, რომ თბილისში მანქანების რაოდენობა ყოველწლიურად იზრდება. კალაძის სტატისტიკით, 2012 წელს თბილისში 180 ათასამდე ავტომობილი იყო, 2020 წელს კი 600 მეტი. მისი თქმით, "ქალაქს ვერ გავბერავთ, ვერ გავზრდით". კიდევ ერთი სტატისტიკა, რომელიც მერმა მოიყვანა, მგზავრების გადაყვანას ეხება. კალაძის თქმით, 55 ავტომობილი უდრის ერთ 12-მეტრიან ავტობუსს, ანუ ორივეს ერთი და იგივე რაოდენობის მგზავრების გადაყვანა შეუძლია.