სასამართლომ ყოფილი პრემიერმინისტრის, ზურაბ ჟვანიას შვილს, ბუსა ჟვანიას აღკვეთის ღონისძიების სახით პატიმრობა შეუფარდა. პროკურატურა მას ბიზნესმენ გოგი თოფაძის შვილიშვილის, ლევან თოფაძის განზრახ მკვლელობის მცდელობას ედავება.

აღნიშნული ბრალი სასჯელის სახედ და ზომად 7 დან 15 წლამდე თავისუფლების აღკვეთას ითვალისწინებს.

გამოძიების ინფორმაციით, ბუსა ჟვანიამ ბიზნესმენ გოგი თოფაძის შვილიშვილს, ლევან თოფაძეს მისივე სახლის აივანზე დანით სიცოცხლისთვის საშიში დაზიანებები მიაყენა, მათ შორის შემავალი ჭრილობები გულმკერდის წინა და უკანა ზედაპირზე, ასევე, ნაკვეთი ჭრილობა კისრის გვერდითა ზედაპირზე და ყურის ნიჟარაზე. უწყების განცხადებით, შემთხვევის ადგილიდან სავარაუდო დანაშაულის ჩადენის იარაღი — დანა ამოიღეს.

ლევან თოფაძე საავადმყოფოში გადაიყვანეს და მას ოპერაცია დასჭირდა. როგორც ექიმები ამბობენ, მისი მდგომარეობა სტაბილურია.

თავდაპირველად გამოძიება სისხლის სამართლის კოდექსის 117-ე მუხლის 1-ლი ნაწილით მიმდინარეობდა, რაც ჯანმრთელობის განზრახ მძიმე დაზიანებას გულისხმობს.