საახალწლო აქციის ფარგლებში, პირადობის მოწმობა უფასო, ბიომეტრიული პასპორტის აღება კი 50 ლარად იქნება შესაძლებელი. აქცია 15 დეკემბრიდან 9 იანვრამდე გაგრძელდება. განცხადება ამის შესახებ, იუსტიციის მინისტრმა, დღეს გამართულ ბრიფინგზე გააკეთა.

"გადავწყვიტეთ, რომ საახალწლოდ გამოვაცხადოთ ჩვენი მოქალაქეებისათვის აქცია, რომლებისთვისაც პირადობის მოწმობა იქნება 15 დეკემბრიდან 9 იანვრამდე უფასო, ხოლო ბიომეტრიული პასპორტი კი შესაძლებელი იქნება ავიღოთ 100 ლარის ნაცვლად 50 ლარად."

აქციის მიზეზი, თეა წულუკიანის თქმით, თვითმმართველობის არჩევნები და ვიზალიბერალიზაცია გახდა:

"აუცილებელია, რომ უვიზო რეჟიმი ევროკავშირის ქვეყნებთან გამოვიყენოთ იმისთვის, რომ საკუთარი თავი და საკუთარი ქვეყანა ღირსეულად წარმოვაჩინოთ, დათქმულ დროს დავბრუნდეთ საქართველოში და არ გავხდეთ კანონის დამრღვევი ევროკავშირის ქვეყნებში და ლეგალური მიგრაცია იყოს გადაადგილება ჩვენი წესი. ამისთვის კი ბიომეტრიული პასპორტი აუცილებელი. ხოლო საარჩევნო სიის დახვეწისთვის ჩვენ ყველას გვჭირდება, რომ გვქონდეს ელექტრონული პირადობის მოწმობა."