"უნდა მოვუსმინოთ და სერიოზულად მივუდგეთ კონგრესიდან წამოსულ წერილებს, რადგან ეს ის ხალხია, ვინც წლებია, აკვირდება საქართველოს განვითარებას და ზრუნავს მის წარმატებაზე", — ასე გამოეხმაურა აშშ-ის ელჩი კელი დეგნანი კონგრესმენების წერილს. 6-მა კონგრესმენმა სახელმწიფო მდივან მაიკ პოპმეოს კრიტიკული წერილი მისწერა, ქართული ოცნებისა და მისი ლიდერის, ბიძინა ივანიშვილის შესახებ.

დეგნანმა, ასევე, აღნიშნა, რომ საქართველოს ჰყავს ლიდერები, რომლებიც ქვეყნის ინტერესების ერთგულია.

"რაც შეეხება ჩემს პირად გამოცდილებას, მქონდა ურთიერთობა მმართველო პარტიის და ოპოზიციის წარმომადგენლებთან. მინდა ვთქვა, რომ საქართველოს ჰყავს ლიდერები, რომლებიც საქართველოს საუკეთესო ინტერესების ერთგულები არიან და ყველაფერს აკეთებენ, რათა ქვეყანას ხელი შეუწყონ წარმატების, კეთილდღეობის, უსაფრთხოებისა და ეკონომიკური სტაბილურობის მიღწევაში", — ამბობს დეგნანი.

გუშინ, 30 ივლისს გავრცელდა კონგრესმენების წერილი, რომელშიც ისინი ქართული ოცნების ხელისუფლებასა და მათ ლიდერს, ბიძინა ივანიშვილს რუს ოლიგარქად მოიხსენიებენ და მის მმართველობას საქართველოში პროგრესის უკან დახევად აფასებენ. კრიტიკის პასუხად მმართველ გუნდში აცხადებენ, რომ ქართულ-ამერიკული ურთიერთობები განვითარების უმაღლეს ეტაპზეა და ქვეყანას აშშ-ის ხელისუფლების სრული მხარდაჭერა აქვს. "ოცნების" დეპუტატების ნაწილი ამბობს იმასაც, რომ ზოგიერთი კონგრესმენი მიკერძოებულია და სხვადასხვა კომპანიის, მათ შორის ფრონტერას ინტერესებს ატარებს.