მთავრობა თურქეთში სამუშაოდ გადასვლის უფლებას მისცემს მხოლოდ იმათ, ვისაც იქაური დამსაქმებელი შესაბამის საბუთს გაუკეთებს. აჭარის ავტონომიური რესპუბლიკის თავმჯდომარის, თორნიკე რიჟვაძის განცხადებით, უკან დაბრუნებულ მოქალაქეებს საკარანტინო რეჟიმის გავლა მოუწევთ.

"ყველა მოქალაქე, რომლის სურვილია თურქეთში გადავიდეს სამუშაოდ, ვალდებული იქნება წარმოადგინოს ოფიცალური ცნობა, სამთვიანი, რომელიც გაცემული იქნება თურქეთში შესაბამისი დამსაქმებლის მხრიდან", — განაცხადა მან.

კორონავირუსის პანდემიის გამო, საზღვრების ჩაკეტვის შემდეგ, თურქეთში სეზონურად დასაქმებულებმა არაერთი საპროტესტო აქცია გამართეს და მეზობელ ქვეყანაში სამუშაოდ გადასვლის უფლება მოითხოვეს.