ფილმის ქარწაღებულნი უკანასკნელი ცოცხალი მსახიობი, ოლივია დე ჰევილენდი, რომელიც ცოტა ხნის წინ 104 წლის გახდა, გუშინ, 25 ივლისს, გარდაიცვალა.

"გუშინ ღამით მსოფლიომ საერთაშორისო საგანძური დაკარგა, მე კი — ძვირფასი მეგობარი და საყვარელი კლიენტი. ის მშვიდად მიიცვალა პარიზში", — თქვა მსახიობის ყოფილმა ადვოკატმა სუზელ სმიტმა.

ჰოლივუდის ოქროს ეპოქის მსახიობმა 1940-იანების მიწურულს ორჯერ მოიგო ოსკარი საუკეთესო მსახიობი ქალისთვის ფილმებში The Heiress და To Each His Own. მან აგრეთვე ოსკარის ნომინაცია მოიპოვა ფილმებისთვის ქარწაღებულნი, The Snake Pit და Hold Back the Dawn.

ოლივია დე ჰევილენდი ლესლი ჰოვარდთან ერთად ფილმში ქარწაღებულნი.

ფოტო: Loew's Inc

"ვინმე თუ ოდესმე ყოფილა დაბადებიდან მსახიობი, ეს ოლივია დე ჰევილენდია. მისი დიქცია შეუდარებელია. მას შეუძლია, ფრაზა რეჟისორისთვის სასურველი ნებისმიერი ინტონაციით თქვას იმდენად ზუსტად, თითქოს პიანინოზე უკრავდეს", — ასე დაახასიათა ერთხელ დე ჰევილენდი ამერიკელმა რეჟისორმა მერვინ ლეროიმ.

ოლივია ფილმის ქარწაღებულნი მთავარი როლების შემსრულებელთა შორის ერთადერთი ცოცხალი ვარსკვლავი იყო ბოლო 50 წელზე მეტი ხნის განმავლობაში. ვივიენ ლი, ლესლი ჰოვარდი და კლარკ გეიბლი გაცილებით ადრე გარდაიცვალნენ, დე ჰევილენდი კი ამ ფაქტზე ნაკლებად ამახვილებდა ყურადღებას. ის დიდწილად თავს არიდებდა საყოველთაო ყურადღების ცენტრში ყოფნას და მშვიდად ცხოვრობდა საფრანგეთში. მსახიობი თავისი ხანგრძლივი კარიერითა და ცხოვრებით კმაყოფილი იყო.

"ბედნიერებას ან კმაყოფილებას კი არ ვგრძნობ, არამედ რაღაც სხვას. უბრალოდ, მადლობელი ვარ, რომ ამდენ ხანს ვიცოცხლე, ამდენი ისეთი რამ მოვასწარი, რისი გაკეთებაც მინდოდა და რომ ამდენად მნიშვნელოვანი ვიყავი სხვა ადამიანებისთვის", — თქვა დე ჰევილენდმა Independent-თან ინტერვიუში 2009 წელს.

ფოტო: THIBAULT CAMUS/AP

მსგავს თემაზე: