პარლამენტის ადამიანის უფლებათა კომტეტის თავმჯდომარე, სოფო კილაძე ამბობს, რომ "ცუდი არაფერია" იმაში, რომ მარნეულის ყოფილი მერი, თემურ აბაზოვი ქართული ოცნების პროპორციულ სიაში შეუყვანონ. აბაზოვი არაადამიანურ და დამამცირებელ მოპყრობაში იყო ბრალდებული, თუმცა მოსამართლემ გაამართა.

"ვნახავთ არჩევნებში, რამდენად არის ქართული ოცნების გუნდისთგის ამ კონკრეტული ადამიანის საპარლამენტო სიაში ჩასმა დამაზიანებელი, მე ესე არ ვფიქრობ. პირი უკვე თავისუფალია. მაგრამ თუ იქნება გადაწყვეტილება გუნდში, ამაში ცინიკური და ცუდი არაფერია", — ამბობს სოფო კილაძე.

ამ საკითხზე ინფორმაციის გადამოწმება On.ge-მ თემურ აბაზოვთანაც სცადა, თუმცა მან სატელეფონო ზარებს არ უპასუხა. მარნეულის ყოფილი მერის პარტიაში დაბრუნებაზე ინფორმაცია IPN-მა გაავრცელა. გამოცემის ცნობით, აბაზოვმა დაადასტურა, რომ შეთავაზება მიიღო.

თემურ აბაზოვი რუსთავის სასამართლომ 12 თებერვალს გაამართლა. არაადამიანური მოპყრობის ბრალდებით აბაზოვი 2018 წლის 13 ივნისს დააკავეს, მას შემდეგ, რაც სტუდია მონიტორის საგამოძიებო მასალა გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა და ძალადობის მსხვერპლი გახდა.

პროკურატურა აცხადებდა, რომ ამ პირს აბაზოვმა სახეში შეაფურთხა, მიაყენა ფიზიკური შეურაცხყოფა, აიძულა მოეშარდა ჭიქაში და შარდით მოებანა სახე. თავდაპირველად, გამოძიება ჯგუფურად განხორციელებული არაადამიანური და დამამცირებელი მოპყრობის ფაქტზე დაიწყო. მოგვიანებით ბრალდებას პირადი ცხოვრების ამსახველი მასალის მოპოვება, ორგანიზება, ინტერნეტითა და სოციალური ქსელებით გავრცელება დაემატა.

10 000-ლარიანი გირაოს სანაცვლოდ საპატიმრო დაწესებულების დატოვების შემდეგ აბაზოვმა სამსახურში განაცდურის სახით 32 000 ლარის ანაზღაურება მოითხოვა, რაზეც მარნეულის მერიისგან უარი მიიღო.

თემურ აბაზოვი ბრალს არ აღიარებს. ის აცხადებდა, რომ ბინძური პროვოკაციების მსხვერპლია.