თამარ ბაჩალიაშვილის საქმეში დამოუკიდებული ექსპერტი, გალინა კარმუშინა ჩაერთვება. აღნიშნული ინფორმაცია, ცენტრ ემპათიას ხელმძღვანელმა, მარიამ ჯიშკარიანმა TV პირველს დაადასტურა.

მისი თქმით, ადვოკატსა და ოჯახთან ერთად შემდგომი სტრატეგიების დასახვაზე იმუშავებენ და თუ საჭიროება მოითხოვს, საქმეში უფრო მეტი ექსპერტიც ჩაერთვება.

"მეც საქმის კურსში ვიქნები, მაგრამ სხვა განმარტების გაკეთება ჩვენ ჯერ არ შეგვიძლია. თუმცა მე ვვარაუდობ, რომ იქნება კომპლექსურ-კომისური ექსპერტიზა ჩასატარებელი და შესაძლებელია, მოვითხოვოთ სისხლის სამართლის მასალები", — აღნიშნა ჯიშკარიანმა.

გალინა კარმოშინა უკრაინელი კრიმინალისტია. მან რამდენიმე დღის წინ მთავარ არხზე გიორგი შაქარაშვილის საქმესა და ექსპერტიზის დასკვნაზე ისაუბრა. მან და მარიამ ჯიშკარიანმა განაცხადეს, რომ გიორგი შაქარაშვილის სხეული წყალში 4 დღე არ იყო, რაც სამხარაულის ექსპერტიზის დასკვნითაც დგინდება.

ექსპერტებისთვის ერთ-ერთი მთავარი არგუმენტი გვამური გაშეშებაა. შაქარაშვილის დაკარგვიდან მის პოვნამდე 84 საათია გასული, ექსპერტები განმარტავენ, რომ ამდენი ხნის განმავლობაში გაშეშება ვერ გაგრძელდება, სამხარაულის დაკსვნაში კი წერია, რომ შაქარაშვილის ცხედარზე "გვამური გაშეშება გამოხატულია ყველა ჯგუფის კუნთებში".

"მე ექსპერტიზის პასუხების და ფოტოების საფუძველზე გადაჭრით შემიძლია ვთქვა რომ ის 48 საათზე ნაკლები დროის გარდაცვლილია, რადგან წარმოუდგენელია გვამური გაშეშებები ცხედარს ჰქონდეს 84 საათის მანძილზე", — განუცხადა კარმოშინამ მთავარ არხს. (ტელეკომპანიის თარგმანი)

თამარ ბაჩალიაშვილის საქმე

23 წლის თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს. საქმეზე გამოძიება თავისუფლების უკანონო აღკვეთის მუხლით მიმდინარეობდა.

დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ოჯახი გამოძიებას უნდობლობას უცხადებს და საქმეში დამოუკიდებელი ექსპერტი ჩაერთო. მათთვის გაურკვეველია, როგორ ვერ იპოვეს მანქანა 4 დღის განმავლობაში, თუკი სამძებრო სამუშაოებში ჩართული იყო დრონი. ადვოკატს, ასევე, აქვს კითხვა, რატომ იპოვა მანქანა მწყემსმა და ვერ მოახერხა ეს პოლიციამ.

ადვოკატის ინფორმაციით, გარდაცვლილის მანქანაში იპოვეს მისი ტელეფონი, რომელიც გამორთული იყო და ამოღებულია სხვადასხვა მედიკამენტიც. რამიშვილს არ აქვს ინფორმაცია, კონკრეტულად რა პრეპარატებია, თუმცა აცხადებს, რომ ფსიქოტროპული არ არის.

სოციალურ ქსელებში და მედიაში გაჩნდა კითხვები ბაჩალიაშვილის სამსახურთან დაკავშირებით. ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და ავსტრიულ Spryflash-ში მუშაობდა. კომპანია ზეგ-ში დღეს შსს შევიდა. დირექტორი ამტკიცებს, რომ ბაჩალიაშვილის გარდაცვალება ზეგ-ში საქმიანობას არ უკავშირდება.