იუსტიციის მინისტრის, თეა წულუკიანის განცხადებით, ბაჩანა შენგელია ნოტარიუსთა პალატის თავმჯდომარეობიდან პოლიტიკური ანგაჟირებულობის გამო, მისი ძალისხმევით გაათავისუფლეს. თუმცა, როგორც აღმოჩნდა, მოქმედი თავმჯდომარე ქართული ოცნების შემომწირველია.

მარიკა გოგოლაძე თავმჯდომარის თანამდებობას 2017 წლიდან იკავებს. 2014 წელს მან ქართულ ოცნებას 12 ათასი ლარი შესწირა.

On.ge მარიკა გოგოლაძეს დაუკავშირდა, რათა ეკითხა, რატომ შესწირა მან ქართულ ოცნებას სოლიდური თანხა, თუმცა მან განგვიცხადა, რომ არ ეცალა და ყურმილი გათიშა, რის შემდეგაც ჩვენს ზარებს არ უპასუხა.

ნოტარიუსთა საერთო კრებას თავმჯდომარის პოსტზე მარიკა გოგოლაძის კანდიდატურა დასამტკიცებლად თეა წულუკიანმა წარუდგინა. იმ დროისთვის გოგოლაძე უკვე იყო მმართველი პარტიის შემომწირველი. იუსტიციის სამინისტროს 2017 წლის განცხადების თანახმად, მიუხედავად იმისა, რომ თავმჯდომარის კანდიდატურას არჩევს და ნოტარიუსთა საერთო კრებას ერთპიროვნულად იუსტიციის მინისტრი წარუდგენს, თეა წულუკიანმა ამაზე უარი თქვა და გოგოლაძის კანდიდატურა ელექტრონული პრაიმერისის შედეგად, ნოტარიუსებმა აირჩიეს.

On.ge ესაუბრა ბაჩანა შენგელიასაც, რომელიც ამბობს, რომ მინისტრის განცხადებები სინამდვილეს არ შეესაბამება და 2013 წელს თანამდებობა საკუთარი განცხადების საფუძველზე დატოვა.

"ოფიციალური მიზეზი ის იყო, რომ განიხილებოდა სისტემისთვის საწინააღმდეგო კანონპროექტი. ამას ვაპროტესტებდით, არ მოგვწონდა და არასწორი იყო. ამას მოჰყვა უთანხმოება და ჩემი განცხადების საფუძველზე დავტოვე თანამდებობა", — ამბობს შენგელია.

მისივე თქმით, თანამდებობაზე ყოფნის პერიოდში პოლიტიკური განცხადებები არ გაუკეთებია და პოლიტიკურ ანგაჟირებულობაზე საუბარი, ასევე, არასწორია.

"მე ვარ პოლიტიკურად ანგაჟირებული, როცა ფეისბუქპოსტების გამო დისციპლინური აღძრეს, პოლიტიკურ ნეიტრალიტეტთან დაკავშირებით შემოაქვთ ბრძანება და ჩემ წინააღმდეგ იყენებენ?! მე ყველა ეტაპზე სამართლებრივ პასუხს ვცემდი. ახლაც არ ვაკეთებ პოლიტიკურ შეფასებას. როგორც ჩანს, ქალბატონი თეა ამ პროცესს სულ პოლიტიკურად უყურებდა.

თუ მაქვს ჩემი პოლიტიკური მოსაზრებები, ეს სამსახურსა და ჩემს თანამდებობას არ უკავშირდება. ბოდიში, მაგრამ სამსახურის მერე თუ არ მომწონს რომელიმე პოლიტიკური პარტია ან გაერთიანება, ეს ჩემი საქმეა. ესენი კიდევ პოლიტიკაზე მე მეუბნებიან, როცა დადასტურებული პოლიტიკური დევნით დედაჩემზე ისეთი ზეწოლა განახორციელეს, რომ სიკვდილამდე მიიყვანეს და სტრასბურგშია საქმე", — აცხადებს ბაჩანა შენგელია.

21 ივლისს თეა წულუკიანმა პირველი არხის ეთერში განაცხადა, რომ შენგელია "ნაციონალების მიერ დატოვებული ნოტარიუსთა პალატის" თავმჯდომარე იყო და თანამდებობიდან მისი ძალისხმევით გათავისუფლდა.

წულუკიანის ამ განცხადებას წინ უძღოდა ბაჩანა შენგელიასთვის სანოტარო საქმიანობის შეჩერება. 29 ივნისს შენგელიამ გამოაქვეყნა იუსტიციის სამინისტროს გენერალური ინსპექციის წერილი, სადაც წერია, რომ ნოტარიუსად მუშაობა პოლიტიკური შეფასებების გამო შეუზღუდეს. დოკუმენტში აღნიშნულია, რომ შენგელიას ფეისბუქს ერთი თვის განმავლობაში ამოწმებდნენ, რის შემდეგაც დაადგინეს, რომ ის "ახორციელებდა მიკერძოებული პოლიტიკური შეხედულების საჯაროდ გამომჟღავნებას და აკეთებდა პოლიტიკურ შეფასებებს".

თუმცა პირველ ივლისს თბილისის საქალაქო სასამართლომ ბაჩანა შენგელიას საჩივრის საფუძველზე იუსტიციის სამინისტროს მისთვის სანოტარო საქმიანობის აღდგენა დაავალა. თავდაპირველად წულუკიანის უწყება სასამართლოს გადაწყვეტილებას არ აღასრულებდა, 15 ივლისს კი შენგელიას სანოტარო საქმიანობა აღუდგინეს. შენგელია აპირებს, საკონსტიტუციო სასამართლოს მიმართოს და შემზღუდავი ნორმა გააპროტესტოს.