"ზონდერ-სპორტსმენ-ოლიგარქ მაჟორიტარულ მანდატებზე მონადირე, მოძალადე, მტაცებელი პირები", — ასე შეაფასა ლეიბორისტული პარტიის ლიდერმა, შალვა ნათელაშვილმა ქართული ოცნების მიერ წარდგენილი მაჟორიტარობის კანდიდატები.

მან, ასევე, ყურადღება გაამახვილა მმართველი პარტიის თავმჯდომარის, ბიძინა ივანიშვილის სიტყვით გამოსვლაზე და იგი რობოტს შეადარა.

"[ბიძინა ივანიშვილის გამოსვლა] ჰგავდა კომპიუტერის ხმას, რომელსაც ჩაუწერეს სრულიად უაზრო ტექსტები და იმეორებდა ყოველგვარი გულის, სულის, ტკივილის, სიყვარულის და ემოციის გარეშე"

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციული კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.