მარნეულელი სამოქალაქო აქტივისტი, რაშან ზიადალიევი ამბობს, რომ დღეს, მარნეულის სოფელ არაფლოში, ერთ-ერთი სახლში ჩხრეკის დროს პოლიციელმა ნარკოტიკული საშუალების ჩადება სცადეს.

ზიადალიევი ვიდეოსაც ავრცელებს, სადაც ჩანს, როგორ მიმდინარეობს ერთ-ერთი სახლის ჩხრეკა, ჩხრეკის დროს კი ერთ-ერთი პირი მაგიდის ქვეშ ხელს ყოფს და სავარაუდოდ, რაღაცას აწებებს.

შინაგან საქმეთა სამინისტროში აცხადებენ, რომ მარნეულის მუნიციპალიტეტის სოფელ არაფლოში სამართალდამცველები მოსამართლის განჩინების საფუძველზე საგამოძიებო მოქმედება-ჩხრეკას ატარებდნენ. უწყების განმარტებით, ადგილზე შეკრებილმა მოსახლეობამ პოლიციას საგამოძიებო მოქმედების ჩატარებაში ხელი შეუშალა.

მათივე ინფორმაციით, მომხდარზე გამოძიება სისხლის სამართლის კოდექსის 353-ე მუხლის მეორე და 381-ე მუხლის პირველი ნაწილით დაიწყო, რაც ჯგუფის მიერ საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარას ან ძალადობას გულისხმობასა და განაჩენის ან სხვა სასამართლო გადაწყვეტილების შეუსრულებლობას ანდა მისი შესრულებისათვის ხელის შეშლას გულისხმობს.