ცნობილ ინგლისელ კომიკოსს, მსახიობს, სცენარისტსა და პროდიუსერ რიკი ჯერვეისს შოუბიზნესში თავისი თამამი იუმორით იცნობენ, რომელიც ხშირად არაფრად აგდებს Cancel Culture-ს — ძირითადად სოციალურ ქსელებში გამოყენებული პრაქტიკა, რომლის მიზანიც ცნობილი ადამიანისთვის რაიმე ქმედების ან მოსაზრებების გამო ბოიკოტის გამოცხადება და მისი კარიერის დასრულებაა.

სულ ცოტა ხნის წინ მიცემულ ინტერვიუში რიკი ჯერვეისმა ამ თანამედროვე ტენდენციაზე ისაუბრა და აღნიშნა, რომ ის მთელ ინდუსტრიაზე ახდენს გავლენას:

"ვფიქრობ, ახლა ყველაფერი გაცილებით რთულადაა, რადგან ხალხი ყველაფერს პირდაპირ იგებს. მრავლად არიან აგრესიული ჯგუფები, რომლებიც ყველაფერს კონტექსტის გარეშე აღიქვამენ. The Office ერთდროულად ყველაფერზე იყო: განსხვავებაზე, სქესზე, რასასა და იმ ყველაფერზე, რაზეც საუბარი დღეს აშინებთ იმის გამო, რომ რამე არასწორი არ თქვან და მათი კარიერა არ დასრულდეს".

მისი თქმით, ამის გამო კომპანიები უფრო და უფრო "ფრთხილ პროდუქტს" ქმნიან:

"BBC ყოველდღიურად უფრო ფრთხილი ხდება, რადგან ადამიანებს უბრალოდ უნდათ, თავიანთი სამსახურები შეინარჩუნონ. დღეს ხალხი ღელავს ზოგიერთ თემასა და ხუმრობაზე, თუნდაც ისინი სრულიად ირონიული იყოს".

ჯერვეისი სატელევიზიო ისტორიაში ერთ-ერთი ყველაზე ცნობილი სიტკომის The Office-ის შექმნაში იღებდა მონაწილეობას. თავად ფიქრობს, რომ მაყურებლები ახლა ოფისის მსგავსი შოუს გაუქმებას მოითხოვდნენ.

"ოფისი დღევანდელი ტენდენციებიდან ამოვარდნილია და ვფიქრობ, ადამიანების ნაწილმა ირონიისა და კონტექსტის აღქმის უნარი დაკარგა. მგონია, რომ შოუსაც ის ბედი ეწეოდა, რაც ხდება ხოლმე ასეთ დროს. მათ, ვისაც მსგავსი საკითხები აწუხებს, ხშირად დავლაპარაკებივარ და ყველაფერი ამიხსნია, მათი პასუხი კი ეს იყო: "არა, არა, არაუშავს, რადგან.." და მიდიან. ხანდახან ისინი ძალიან შეშინებულები არიან, რადგან კითხვებზე პასუხის მიღება არ სურთ, ისინი უბრალოდ ამბობენ: "ამის ნახვა არ მსურს, ამიტომაც ავკრძალოთ ის", — განაცხადა რიკი ჯერვეისმა.

ამავდროულად ჯერვეისი აცხადებს, რომ ბევრმა სიტყვის თავისუფლება რადიკალურად არასწორად გაიგო: "ზოგიერთი ადამიანი ფიქრობს, რომ სიტყვის თავისუფლება ყველაფრის შედეგების გაუთვალისწინებლად თქმას გულისხმობს და ასე ნამდვილად არ არის".

ფოტო: NBC

ამ ბრიტანელმა ხელოვანმა განსაკუთრებული ყურადღება მიიპყრო ოქროს გლობუსის წლევანდელ დაჯილდოებაზე, სადაც წამყვანის ამპლუაში იყო და თავისი ენამწარე გამოსვლით დაჯილდოებაზე წარმოდგენილი ლამის უკლებლივ ყველა ვარსკვლავი გააქილიკა:

"თუ დღეს ჯილდოს მოიგებთ, ეს პლატფორმა პოლიტიკური გზავნილებისთვის არ გამოიყენოთ, კარგი? იმ მდგომარეობაში არ ხართ, რომ ხალხს ლექცია ჩაუტაროთ რამეზე. არაფერი იცით რეალური სამყაროს შესახებ. სკოლაში ბევრმა თქვენგანმა უფრო ნაკლები დრო გაატარა, ვიდრე გრეტა თუნბერგმა", — ნაწყვეტი მისი მონოლოგიდან, რომელიც ინტერნეტში მალევე გავრცელდა და მილიონობით ადამიანმა ნახა.

ასევე შეგახსენებთ, რომ რიკი ჯერვეისი ნეტფლიქსთან ერთად მუშაობს კომედიურ დრამა After Life-ზე, რომელსაც მაღალი რეიტინგის გამო მესამე სეზონი დაუმტკიცდა.