ქართული ოცნების დეპუტატი, კობა კობალაძის თქმით, შვილი ისე არ გაუზრდია, რომ დანები ატრიალოს. ამის შესახებ კობალაძემ 23 წლის ბიჭის ცემის საქმეში მისი შვილის მონაწილეობაზე საუბრისას განაცხადა. დეპუტატის თქმით, მისი შვილი სრულწლოვანია და ყველაფერი გათავისებული აქვს.

"აქვს ინტერესი კონკრეტულად გამოძიებას ალბათ მასთან და შესაბამისად, ჩატარდება ის პროცედურები, რაც უნდა ჩატარდეს და ამისდა მიხედვით გაირკვევა ყველაფერი. სრულწლოვანია, გათავისებული აქვს ყველაფერი. არ გამიზრდია ისე, რომ დანები ატრიალოს. ის არის ჯანმრთელი ბავშვი, ჯანსაღი ცხოვრების წესით ცხოვრობს. ჩემთვის უმთავრესი ის არის, რომ პრინციპში, არ არის მსხვერპლი. გამოჩნდება ყველაფერი და დამნაშავე პასუხს აგებს", — განაცხადა ფორმულასთან კობალაძემ.

ტელეკომპანია პირველის ინფორმაციით, ქართული ოცნების დეპუტატ კობა კობალაძის შვილი და კიდევ რამდენიმე პირი ქუჩაში ადამიანს თავს დაესხნენ და სცემეს, რის შედეგადაც ის საავადმყოფოში აღმოჩნდა.

ჟურნალისტი დაზარალებულის მამის ფარულ ინტერვიუზე დაყრდნობით ამბობს, რომ ბიჭს დაზიანებები თავშიც აქვს მიყენებული.

სიუჟეტის ეთერში გასვლამდე გადაცემის წამყვანმა, ნოდარ მელაძემ თქვა, რომ მას დაზარალებულის მამა დაუკავშირდა და სთხოვა, მასალა არ გასულიყო და ეს მას შემდეგ მოხდა, რაც ჟურნალისტმა კითხვებით დეპუტატ კობალაძესაც მიმართა.

TV პირველის ინფორმაციით, შემთხვევა 24 ივნისს, საბურთალოზე მოხდა და გამოძიება არ დაწყებულა.

გადაცემის ანონის გასვლის შემდეგ განცხადება გაავრცელა შინაგან საქმეთა სამინისტრომ, სადაც უწყება ამტკიცებს, რომ 23 წლის ბიჭის ჯანმრთელობის დაზიანების ფაქტზე გამოძიება იმავე დღეს, ვაკე-საბურთალოს მთავარი სამმართველოს პოლიციის მე-7 სამმართველოში, ჯანმრთელობის დაზიანების ფაქტზე დაიწყო.

გარდა ამისა, შსს-ს თქმით, ანონსის გავრცელების შემდეგ "საქმეში გამავალი პირების მიმალვის" საფრთხე შეიქმნა, რადგან დანაშაულის შესახებ პირდაპირ ეთერში გაჟღერდა. უწყება ამბობს, რომ ამის გამო ამ პირების დაკავების გადაწყვეტილება მიიღეს და ორი ადამიანი დააკავეს, კობა კობალაძის შვილი კი თავად მივიდა განყოფილებაში. ყველა მათგანი სრულწლოვანია.

როგორც შსს განცხადებაში მიუთითებს, ერთი დაკავებულის წინააღმდეგ გამოძიება ჯანმრთელობის განზრახ მძიმე დაზიანების მუხლით მიმდინარეობს, მეორე დაკავებულის წინააღმდეგ კი — ძალადობისა და ცივი იარაღის ტარებისთვის. რაც შეეხება "ოცნების" დეპუტატის შვილს, მის შესახებ უწყება მხოლოდ იმას ამბობს, რომ "განყოფილებაში პირადი ინიციატივით გამოცხადდა". შსს არ აკონკრეტებს, ედავებიან თუ არა რომელიმე დანაშაულს მას.

დეპუტატმა კობა კობალაძემ შსს-ს განცხადების შემდეგ რუსთავი 2-ს უთხრა, რომ განყოფილებაში შვილთან ერთად მივიდა, ჩატარდება საგამოძიებო მოქმედებები და ფაქტს სამართლებრივი შეფასება მიეცემა.

"ჩემი შვილი და მე ერთად გამოვცხადდით განყოფილებაში. მილიონი რაღაცაა აგორებული მასზე. ჩატარდება კონკრეტული საგამოძიებო ქმედებები და რეალურად, სამართლებრივი შეფასება მიეცემა ამას. არც არავის ხელს ვაფარებთ და არც უდანაშაულობას დანაშაულად არ ვიზამთ. ბავშვი არის სპორტსმენი, ჯანმრთელი, ამბავი... არ ვიცი, გაერკვევიან", — ამბობს კობალაძე.