იცით, ვისი იმედი უნდა გქონდეთ, თუ ახლომახლო შხამიან გველს შენიშნავთ? ერთგული ძაღლების, რომლებიც მზად არიან, საშიშროების მიუხედავად, იზრუნონ პატრონებზე.

ცხოველთა მონიტორინგის სამსახურის უფროსმა, ვახტანგ ლომჯარიამ ახლახან მომხდარი ამბავი საზოგადოებას ფეისბუქით გაუზიარა: ტაბახმელაში 5 წლის ბიჭი ძაღლმა შხამიანი გველის ნაკბენისგან იხსნა. პოსტს სტატიის დაწერის მომენტისათვის 7 000-ზე მეტი მოწონება და 2 000-ზე მეტი გაზიარება აქვს.

ჩვენ დეტალების დასაზუსტებლად ძაღლის პატრონს, სვიმონ ჯანგულაშვილს ვესაუბრეთ, რომელმაც მოგვიყვა, რომ ამ ისტორიას მეორე გმირიც ჰყავს.

"ვცხოვრობთ ტაბახმელაში, ჩვენი სახლი დასახლების განაპირასაა და იმისიქით პირდაპირ მინდორი იწყება. ძალიან რომ ცხელა, ეზოში რამდენჯერმე შემოვიდნენ ქვეწარმავლები. ეს, მგონი, მეექვსე შემთხვევა იყო. მყავს ორი ძაღლი, ჰასკი ლაქი და მეტისი სანი. ეს ძაღლები იცავენ სახლს და ეზოს. დილით მოგვესმა ყეფა, ბავშვი იყო გასული ეზოში და უცებ ჩვენკენ გამოიქცა. ვერ მიხვდა ოღონდ, რა ხდებოდა. დავინახეთ, რომ ძაღლებს გველი ჰყავდათ მომწყვდეული. საკმაოდ მსხვილი ქვეწარმავალი იყო და თავი ჰქონდა ისეთი, რომ მივხვდით, რომ შხამიანი იქნებოდა. ეს ბრძოლა საკმაოდ დიდხანს გაგრძელდა. რაღაც მომენტში ლაქი უკან გადმოხტა და მივხვდით, რომ გველმა უკბინა. დავრეკეთ ცხოველთა მონიტორინგის სამსახურში. მალევე წამოვიდნენ, მაგრამ თბილისიდან ტაბახმელამდე გზას მაინც დრო უნდა. რომ მოვიდნენ, თქვეს, გიურზა არისო. ძაღლი ეგრევე გავაქანეთ კლინიკაში, აცრეს და მკურნალობა ჩაუტარეს. ახლა სახლში გვყავს უკვე და ნემსებს ვუკეთებთ, მაგრამ უკეთესადაა და არაფერი დაშავებია. ლაქი როცა მაჩუქეს, ლეკვი იყო. ძალიან თბილი და მოსიყვარულეა. ერთი წამით არ ჩერდება. სულ ეზოშია. ძალიან ერთგულია და ფაქტობრივად, გადაეფარა ბავშვს. გადაგვარჩინა"

გიურზა საქართველოში გავრცელებული ყველაზე შხამიანი გველია. მისი ნაკბენი ხშირად სასიკვდილოა ადამიანისა და ცხოველებისათვის. ტაბახმელაში გიურზები აქამდე არასდროს დაუფიქსირებიათ და მათი გამოჩენის მიზეზი, სავარაუდოდ, უჩვეულოდ ცხელი ზაფხულია.

ფოტო: სვიმონ ჯანგულაშვილი

ლაქის ახლა სახეზე დროებითი სასაცილო ასიმეტრია აქვს, რომელიც მალე გაუვლის. მის მიერ ჩადენილი გმირობა კი გადარჩენილ პატარასა და მისი ოჯახის წევრებს სამუდამოდ ემახსოვრებათ.