ფინანსთა მინისტრის, ვანო მაჭავარიანის განცხადებით, საზღვრის გასახსნელად აუცილებელია ქვეყნები და უსაფრთხოების წესები სწორად შეირჩეს. ამ თემაზე მან მთავრობის პრესკონფერენციაზე ისაუბრა და აღნიშნა, რომ მთავრობის ეს მიდგომა არ ნიშნავს, რომ საზღვარი არავისთან გაიხსნება.

"ეს ნიშნავს, რომ სიფრთხილით მოვეკიდებით და შევეცდებით, რომ ან ის ქვეყნები შეირჩეს სწორედ, ან წესი შეირჩეს, იქნება ეს მიმოსვლის, თუ სხვა ტიპის უსაფრთხოების წესები ისე დადგინდეს, რომ პირველ რიგში ავიცილოთ ეპიდემიოლოგიური აფეთქება და მეორე რიგში ხელი შევუწყოთ მიმოსვლას", — თქვა ვანო მაჭავარიანმა.

მინისტრის აზრით, 1-2 თვის მანძილზე ეს სახელმწიფოს მხრიდან ადეკვატური მიდგომაა.

დღეს, 2 ივლისს ცნობილი გახდა, რომ მთავრობა მოქალაქეების სამშობლოში დასაბრუნებლად რეისებს აღადგენს. გახარიას თქმით, ბილეთის ფასი 200 ევროზე მეტი არ იქნება.

30 ივნისს ევროკავშირის საბჭომ გამოაქვეყნა იმ 15 "უსაფრთხო" ქვეყნის სია, რომელთანაც პირველი ივლისიდან მოგზაურობას აახლებს. მათ შორის მოხვდა საქართველოც.

მოგზაურთა დასაშვებად, მესამე ქვეყნებისთვის განმსაზღვრელია ეპიდემიოლოგიური მდგომარეობა და უსაფრთხოების ზომები, როგორიცაა, ფიზიკური დისტანცია და ეკონომიკური და სოციალური მოსაზრებები. საბჭოს განცხადებით, ეპიდემიოლოგიური სიტუაციის თვალსაზრისით, მესამე ქვეყნები შემდეგ კრიტერიუმებს უნდა აკმაყოფილებდნენ:

  • კორონავირუსის ახალი შემთხვევები 14 დღის განმავლობაში 100 000 ადამიანზე ევროპის საშუალო მონაცემებთან ახლოს ან ქვემოთ (2020 წლის 15 ივნისის მდგომარეობით);
  • ახალი შემთხვევების სტაბილური ან კლებადი ტენდენცია აღნიშნულ პერიოდში, წინა 14 დღესთან შედარებით;
  • ზოგადი პასუხი COVID-19-თან, სადაც მხედველობაში მიიღება ტესტირება, დაკვირვება, კონტაქტების მოძიება, მკურნალობა და ინფორმაციის სანდოობა. ასევე, საჭიროების შემთხვევაში ჯანდაცვის საერთაშორისო რეგულირების საშუალო ქულა.