თბილისის საკრებულოს ინფორმაციით, 2015 წლის 13 ივნისის სტიქიით დაზარალებული ოჯახებისა და ფიზიკური პირებისათვის, რომლებიც ამ დრომდე ქირით ცხოვრობდნენ, დამატებითი თანხები გამოიყოფა.

დღეს, 13 მაისს ჩატარებულ საკრებულოს სხდომაზე დეპუტატებმა დადებითად შეაფასეს მერიის ქონების მართვის სააგენტოს უფროსის, კარლო ლაფერაძის წარდგენილი საკითხი, რომელიც 13-14 ივნისს მომხდარი სტიქიის შედეგად დაზარალებულთა საცხოვრებლით უზრუნველყოფის, უძრავი ქონების დათმობისა და სხვა სახის ფულადი დახმარების გაცემის წესის დამტკიცების შესახებ საკრებულოს დადგენილებაში ცვლილების შეტანას გულისხმობს.

ცვლილებების თანახმად, 13 ივნისის სტიქიის შედეგად დაზარალებულ ერთ და ორსულიან ოჯახებს ერთჯერადად 4 ათასი ლარით, სამ და მეტსულიან ოჯახებს კი 6 ათასი ლარით დაეხმარებიან.