ევროპული საქართველოს წევრი, გიგა ბოკერია ირაკლი კობახიძეს პასუხობს და ამბობს, რომ მას იმხელა გავლენა და კონტაქტები არ აქვს, რომ გიორგი რურუასთან დაკავშირებით აშშ-ს თავდაცვის აქტში შესწორების შეტანა შეეძლოს.

"ბატონი კობახიძე ჩემთვის კომპლიმენტების თქმას აგრძელებს. ჯერ თქვა, რომ გოიმებში ნომერ პირველიაო, ოღონდ მაგარი გოიმი არისო. ახლა თქვა ჩემზე, რომ ჩემი პირადი კონტაქტები განსაზღვრავს სენატის გადაწყვეტილებებს. პირველი კომპლიმენტი მივიღე, რომ სადაც ხარ, იქ პირველობას უნდა ეცადო მართლა. მეორეს სამწუხაროდ ვერ დავიბრალებ, არ მაქვს ამხელა გავლენა", — განაცხადა კობახიძემ.

ქართული ოცნების აღმასრულებელი მდივანი, ირაკლი კობახიძე ამბობს, რომ გიორგი რურუასთან დაკავშირებით აშშ-ს თავდაცვის აქტში შესწორების შეტანა გიგა ბოკერიასა და სენატის საგარეო კომიტეტის აპარატის უფროსის მეგობრობის შედეგია.

მისი თქმით, ეს ქართულ ოცნებას ვერაფერს დააკლებს, მაგრამ ის, რომ თუნდაც თავდაცვის აქტის პროექტში რურუას ხსენება, საერთაშორისო პარტნიორებია რეპუტაციას აზიანებს.

ამერიკის შეერთებული შტატების სენატის საგარეო კომიტეტის თავმჯდომარემ, ჯიმ რიშმა ეროვნული თავდაცვის აქტში შესატანი ცვლილება მოამზადა, რაც საქართველოს დემოკრატიას, საარჩევნო და სასამართლო რეფორმას ეხება.

ტექსტში საუბარია იმაზე, რომ სენატი ხელახლა ადასტურებს სურვილს აშშ-სა და საქართველოს შორის თანამშრომლობის გაგრძელებასთან დაკავშირებით, "თუ საქართველოს მთავრობა კვლავ გამოავლენს ამ რეფორმების გატარების გულწრფელ სურვილს".

ტექსტში საუბარია ბრალდებულ გიორგი რურუაზეც, რომლის გათავისუფლებასაც ოპოზიცია ითხოვს.

რიშის დოკუმენტში წერია, რომ 8 მარტის შეთანხმების მიუხედავად, გიორგი რურუა კვლავ დაკავებულია.

"საქართველოში არსებული ოპოზიციური პარტიების განცხადებით, ყველა პოლიტიკური პატიმრის — მათ შორის, ბატონი რურუას — გათავისუფლება წარმოადგენს წინაპირობას იმისთვის, რომ მხარი დაუჭირონ საარჩევნო კანონის შეთანხმებულ ცვლილებებს.

საარჩევნო სისტემაში შეთანხმებული ცვლილებები კვლავ არასრულია იმის მიუხედავად, რომ საპარლამენტო არჩევნები 2020 წლის ოქტომბრის ბოლოსაა დანიშნული", — რიშის მიერ მომზადებულ დოკუმენტში.