თბილისის მერიის პრესსამსახურის ინფორმაციით, თამარაშვილის გამზირზე წაქცეულ ხესთან დაკავშირებით პირველადი დათვალიერება ჩატარდა. პრესრელიზში წერია და გამოგზავნილ ფოტოებშიც ჩანს, რომ ადგილზე თბილისის მერის მოადგილეები მაია ბითაძე და ირაკლი ბენდელიანი, ეროვნული ბოტანიკური ბაღის ექსპერტებთან ერთად მივიდნენ და წაქცეული ხე დაათვალიერეს.

ფოტო: თბილისის მერია

თბილისის მერიის განცხადებით, ხის წაქცევასთან დაკავშირებით, თბილისის მერიისა და დამოუკიდებელი ექსპერტების მიერ დამატებითი კვლევები ჩატარდება. მაია ბითაძის განცხადებით, დარღვევის გამოვლენის შემთხვევაში შესაბამისი ზომები იქნება მიღებული.

ფოტო: მერია

ფოტო: თბილისის მერია

როგორც ბითაძემ აღნიშნა, პირველადი დათვალიერების შედეგად გამოვლინდა, რომ თამარაშვილის გამზირზე წაქცეულ ხეს, წლების განმავლობაში სხვადასხვა სარეაბილიტაციო სამუშაოს დროს ფესვთა სისტემა უზიანდებოდა, რამაც ხის ადგილიდან დაძვრა გამოიწვია.

"პირველადი დათვალიერებით, რომელსაც, ბუნებრივია შემდგომი კვლევა სჭირდება, რაზეც უკვე დაწყებულია მუშაობა, ჩვენი და დამოუკიდებელი ექსპერტების მიერ, სავარაუდოდ ხე, რომელიც საკმაოდ ხნოვანია, დაახლოებით 60 წლის არის. წლების განმავლობაში მას სხვადასხვა სარეაბილიტაციო სამუშაოს დროს უზიანდებოდა ფესვთა სისტემა და ის ემყარებოდა ერთადერთ ცოცხალ ფესვს, რომლის ქვეშ მიწის გამოცლის შედეგად მოხდა ხის ადგილიდან დაძვრ", — განაცხადა მაია ბითაძემ.

თამარაშვილის გამზირზე ხე გუშინ, 25 ივნისს წაიქცა და მანქანას დაეცა. როგორც On.ge-ს საგანგებო სიტუაციების მართვის სამსახურში განუცხადეს, შემთხვევის შედეგად 2 მანქანა დაზიანდა, ხოლი 1 მანქანის მძღოლი მსუბუქად დაშავდა.