ფრაქცია დამოუკიდებელი დეპუტატების წევრის მარიამ ჯაშის განცხადებით, ნებისმიერ პოლიტიკოსს, რომელიც დემოკრატიულად მოაზროვნეა არ აქვს უფლება გაემიჯნოს საკონსტიტუციო ცვლილებების პროცესს. ამ თემაზე კომენტარი მან იმედთან გააკეთა.

"ფრაქცია დამოუკიდებელი დეპუტატების 100%-იანი მხარდაჭერა საკონსტიტუციო ცვლილებებს ექნება როგორც მეორე, ისე მესამე მოსმენაზე. ნებისმიერ პოლიტიკოსს, რომელსაც აქვს პრეტენზია, რომ არის დემოკრატიულად მოაზროვნე და რეალურად ქვეყნის გრძელვადიან ინტერესებზე ორიენტირებული მას არ აქვს უფლება, რომ გაემიჯნოს ამ პროცესს", — თქვა მარიამ ჯაშმა.

საქართველოს პარლამენტმა საკონსტიტუციო ცვლილებებს პირველი მოსმენით მხარი დაუჭირა. ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება. ცვლილებებს მხარი 136-მა დეპუტატმა დაუჭირა, 5-მა წინააღმდეგ მისცა ხმა.

ცვლილებებს მხარი დაუჭირა ევროპული საქართველომაც. დავით ბაქრაძის განცხადებით, პარტიამ ეს გადაწყვეტილება მიიღო, რათა ქართულ ოცნებას არ ჰქონდეს შესაძლებლობა, საარჩევნო სისტემის ცვლილებები კვლავ ჩააგდოს. მისივე თქმით, ასე დარჩება მეტი დრო იმისთვის, რომ შეთანხმება შესრულდეს "პოლიტიკური დევნის" ნაწილში და იმისთვის, რომ პროკურატურამ მიიღოს გადაწყვეტილება გიორგი რურუას გათავისუფლებასთან დაკავშირებით.

კენჭირსყრის დაწყებამდე ცნობილი გახდა, რომ ცვლილებებს მხარს არ დაუჭრდნენ: ემზარ კვიციანი, ნატო ჩხეიძე, ბიძინა გეგიძე, დავით ჭიჭინაძე და ალექსანდრე ერქვანია. კენჭისყრაში მონაწილეობა არ მიუღია ნაციონალურ მოძრაობასაც. ასევე, ცნობილი იყო, რომ უმრავლესობის მაჟორიტარი დეპუტატი, კახა ოქრიაშვილი ცვლილებებს მხარს არ დაუჭერდა.