ევროპული საქართველო საარჩევნო სისტემის ცვლილებების კენჭისყრაში მონაწილეობას მიიღებს და პირველი მოსმენით მხარს დაუჭერს. ამის შესახებ რამდენიმე წუთის წინ, პარტიის ოფისში გაკეთებული განცხადებით გახდა ცნობილი.

დავით ბაქრაძის განცხადებით, ამ კენჭისყრას უზარმაზარი მნიშვნელობა აქვს 8 მარტის შეთანხმებისთვის და პარტიამ ეს გადაწყვეტილება მიიღო, რათა ქართულ ოცნებას არ ჰქონდეს შესაძლებლობა, საარჩევნო სისტემის ცვლილებები კვლავ ჩააგდოს.

"იმისთვის, რომ ამ შეთანხმებას ჰქონდეს შესრულების პერსპექტივა, იმისთვის, რომ ქართული ოცნების მხრიდან ხვალ არ ვიხილოთ ისეთივე გადაგდება, როგორც ვიხილეთ ნოემბერში და ამით წერტილი არ დაესვას ქვეყანაში პროპორციულ და სამართლიან სისტემაზე გადასვლის პერსპექტივას, ჩვენ მივიღეთ გადაწყვეტილება, რომ მონაწილეობას მივიღებთ სხდომაში და პირველი მოსმენით მხარს დავუჭერთ საკონსტიტუციო ცვლილებებს", — აღნიშნა მან.

მისივე თქმით, ასე დარჩება მეტი დრო იმისთვის, რომ შეთანხმება შესრულდეს "პოლიტიკური დევნის" ნაწილში და იმისთვის, რომ პროკურატურამ მიიღოს გადაწყვეტილება გიორგი რურუას გათავისუფლებასთან დაკავშირებით. დავით ბაქრაძე ამბობს, რომ ბიძინა ივანიშვილს არ მისცემენ საშუალებას, კიდევ ერთხელ მოატყუოს საზოგადოება პროპორციულ არჩევნებთან დაკავშირებით.

"თუ ხვალ საკითხი ჩავარდა პირველ მოსმენაზე, ეს ნიშნავს, რომ განხილვა დამთავრდა. პირველი მოსმენით გატანის შემდეგ, მეორე და მესამე მოსმენაზე საკითხი რომც ჩავარდეს, იმავე დღეს შეიძლება მისი ხელახლა შემოტანა. ანუ ხვალინდელი კენჭისყრა არის სრულიად გადამწყვეტი", — თქვა ბაქრაძემ.

მანვე აღნიშნა, რომ ევროპული საქართველო პასუხისმგებლიანი ოპოზიციაა და მათ შორის, პასუხისმგებლობა აქვთ იმ ახალგაზრდების წინაშეც, რომლებმაც ერთი წლის წინ, 20 მაისის მოვლენების დროს, საკუთარი ჯანმრთელობის ფასად მიაღწიეს დაპირებას პროპორციული არჩევნების შესახებ.

"პასუხისმგებლიანები ვართ გიორგი რურუას წინაშე, რომელიც უკანონო პატიმარია და რომლის გამშვების მთავარი ინსტრუმენტი გახლავთ სწორედ 8 მარტის შეთანხმების შესრულება და გადარჩენა", — აღნიშნა მან და დასძინა, რომ რურუას საკითხი განხილვების პროცესში კვლავ აქტუალური იქნება.

ბაქრაძემ ხაზი გაუსვა, რომ ეს არ არის 8 მარტის ბოლომდე შესრულება, მაგრამ ხელისუფლებას არ მისცემენ შეთანხმების დარღვევის საშუალებას.

საკონსტიტუციო ცვლილებები, რომლის მიხედვით მომავალი არჩევნების შედეგად საკანონმდებლო ორგანოში მხოლოდ 30 მაჟორიტარი დეპუტატი იქნება, ხოლო 120 პარტიული სიით შევა, დეპუტატებმა პირველი მოსმენით ხვალ უნდა განიხილონ. ხვალვე იქნება კენჭისყრაც.

ცვლილებები კონსტიტუციაში მას შემდეგ დაიგეგმა, რაც ოპოზიცია და ხელისუფლება საბოლოოდ შეთანხმდა. თუმცა პრობლემად რჩება ის, რომ 8 მარტის შეთანხმება სრულყოფილად შესრულებული არ არის. ოპოზიცია 20 ივნისის საქმეზე დაკავებული გიორგი რურუას გათავისუფლებას ითხოვს.