ევროპული საქართველოს დეპუტატი გიორგი კანდელაკის თქმით, როცა გერმანიის მთავრობა მოკლული საქართველოს მოქალაქის, ზელიმხან ხანგოშვილის მკვლელობას ასე ეხმაურება, საქართველოს მთავრობამ რამე მაინც უნდა გააკეთოს. ამ თემაზე მან კომენტარი TV პირველთან გააკეთა.

"აღსანიშნავია, რომ ეს განცხადება გერმანიის ფედერალურმა პროკურატურამ გააკეთა ხანგრძლივი გამოძიების შედეგად, ის, რომ საქართველოს ხელისუფლებას დღემდე არაფერი არ უთქვამს ზელიმხან ხანგოშვილის მკვლელობაზე, არის გამაოგნებელი. როცა გერმანიის მთავრობა ასე მწვავედ რეაგირებს საქართველოს მოქალაქის მკვლელობაზე, საქართველოს მთავრობამ რაღაც ხომ მაინც უნდა გააკეთოს, არა?!" — თქვა გიორგი კანდელაკმა.

გერმანიის ელჩმა, ჰუბერტ კნირშიმა დღეს, 18 ივნისს თქვა, რომ გერმანიის პროკურატურის სიტყვები საქართველოს მთავრობის პრორუსულობასთან დაკავშირებით ეკუთვნოდა გარდაცვლილ ზელიმხან ხანგოშვილს და არა თვითონ პროკურატურას. როგორც ელჩი ამბობს, პროკურატურამ გამოიყენა ისეთი ფორმულირება, რომელიც ოპტიმალური არ იყო და შესაძლოა უკეთესიც ყოფილიყო.

"პროკურატურა ამ სიტყვების გამოყენებისას ცდილობდა მოკლულის ციტირებას. როცა განმარტავდა, რატომ იყო გერმანიაში და მან განაცხადა, რომ ის ეწინააღმდეგებოდა ე.წ. საქართველოს პრორუსულ ხელისუფლებას. მაგრამ ეს იყო გარდაცვლილის სიტყვები და არა გერმანიის პროკურატურის სიტყვები. ვწუხვარ, რომ შთაბეჭდილება შეიქმნა, თითქოს ჩვენს პროკურატურას სურდა, დაეხასიათებინა საქართველოს მთავრობის პოლიტიკური ორიენტაცია, ეს არ ყოფილა მათი განზრახვა", — განაცხადა გერმანიის ელჩმა ჰუბერტ კნირშმა.

გერმანიის ფედერალურმა პროკურატურამ საქართველოს მოქალაქის, ზელიმხან ხანგოშვილის, იგივე თორნიკე ქავთარაშვილის მკვლელობაში ბრალდებულს ბრალი წარუდგინა. რადიო თავისუფლების რუსული სამსახურის ინფორმაციით, პროკურატურის ტექსტში აღნიშნულია, რომ ბრალდებულმა დანაშაული რუსეთის ხელისუფლების დაკვეთით შეასრულა. ამასთან, გერმანიის პროკურატურა საქართველოს მთავრობას პრორუსულს უწოდებს.

როგორც პროკურატურაში ამბობენ, რუსეთის ხელისუფლებად დაქვემდებარებულმა უწყებებმა ხანგოშვილის ლიკვიდაციის დავალება გასცეს. ტექსტში ასევე აღნიშნულია, რომ ხანგოშვილი ფედერალური არმიის წინააღმდეგ ჩეჩენი სეპარატისტების მხარეს იბრძოდა, ხოლო 2008 წელს სამხრეთ ოსეთში რუსეთთან საომრად დაჯგუფება შეკრიბა.

ზელიმხან ხანგოშვილი გერმანიაში 2019 წლის 23 აგვისტოს მოკლეს. მალევე მის მკვლელობაში ბრალდებული დააკავეს, რომელიც რუსეთის მოქალაქე აღმოჩნდა.

პროკურატურის განცხადებაში მკვლელობაში ბრალდებულის გვარს არ ამბობენ და მხოლოდ ვადიმ კ.-თი მოიხსენიებენ. 2019 წლის დეკემბერში Bellingcat-მა გამოაქვეყნა ჟურნალისტური გამოძიების თანახმად, ხანგოშვილის მკვლელობაში ბრალდებულს ვადიმ კრასიკოვი ჰქვია, ხოლო გერმანიაში ის ვადიმ სოკოლოვის სახელზე გაცემული პასპორტით ჩავიდა.

როგორც გერმანიის საგამოძიებო უწყების ტექსტშია აღნიშნული, დავალების შესასრულებლად ვადიმ კრასიკოვი 17 აგვისტოს მოსკოვიდან ჯერ პარიზში გაემგზავრა, იქიდან კი 20 აგვისტოს ვარშავაში გადავიდა. პოლონეთიდან ის უცნობი მარშრუტით ბერლინში 22 ივნისს გაემგზავრა. შენგენის ზონაში შესვლისთვის მან ვადიმ სოკოლოვის პასპორტი გამოიყენა, რომელიც ბრიანსკში რუსეთის საიმიგრაციო სამსახურის მიერ 2019 წლის 18 ივლისს გაიცა.

23 აგვისტოს ბერლინის ერთ-ერთ პარკში ვადიმ კრასიკოვი ზელიმხან ხანგოშვილს ველოსიპედით უკნიდან მიუახლოვდა, ხოლო როცა მიუახლოვდა Glock 26-ის ტიპის იარაღიდან ესროლა. როგორც პროკურატურა აღწერს, ხანგოშვილი მიწაზე დაეცა, ველოსპიდიდან ჩამოვარდა ბრალდებულიც, თუმცა მალევე მიუახლოვდა ხანგოშვილს და თავში კიდევ ორჯერ ესროლა. ხანგოშვილი ადგილზე გარდაიცვალა.

რუსეთის ხელისუფლება ხანგოშვილის ლიკვიდაციაში თანამონაწილეობას უარყოფს. ამასთან, რუსეთის პრეზიდენტი, ვლადიმერ პუტინი მას "ბოევიკს" უწოდებდა და ამბობდა, რომ მოსკოვის მეტროს აფეთქებაში იყო დამნაშავე. მისივე თქმით, რუსეთი გერმანიისგან ხანგოშვილის გადაცემას მოითხოვდა. გერმანია კი ამას უარყოფს.