ნეტფლიქსი ბოლო პერიოდში სატელევიზიო შოუებთან ერთად სულ უფრო მეტ ახალ ფილმს სთავაზობს თავის მომხმარებლებს და მათ შორის არა მხოლოდ ჰოლივუდელი რეჟისორების, არამედ ევროპელი, აზიელი და ლათინოამერიკელი კინოხელოვანების ნამუშევრებიც შეინიშნება.

ფრანგი რეჟისორის ოლივერ ასაიასის ახალი კინოსურათიც Wasp Network მალე გამოჩნდება ამ სტრიმინგ სერვისის პლატფორმაზე და მილიონობით მაყურებელს კუბელი ჯაშუშების შესახებ გადაღებული პოლიტიკური თრილერის ხილვა შეეძლება.

ფილმის ტრეილერი ცოტა ხნის წინ გავრცელდა:

ფილმი ბრაზილიელი ჟურნალისტის ფერნანდო მორაის წიგნის The Last Soldiers of the Cold War: The Story of the Cuban Five მიხედვით გადაიღეს და ის რეალური ისტორიის შესახებ მოგვითხრობს: კუბის ხუთი მოქალაქე ჯაშუშობის ბრალდებით 1998 წელს დააკავეს და ეს დიდი პოლიტიკური სკანდალის მიზეზი გახდა.

ამ ისტორიის მთავარი მოქმედი პირების როლებს ფილმში პენელოპე კრუზი და ედგარ რამირესი ასრულებენ. ეს ორი მსახიობი ასევე ერთად თამაშობდა 2018 წელს რაიან მერფის გახმაურებულ სერიალში American Crime Story, რომელშიც ცნობილ იტალიელ და-ძმას —ჯანი და დონატელა ვერსაჩეს განასახიერებდნენ.

ოლივერ ასაიასს 2016 წელს კანის კინოფესტივალზე საუკეთესო რეჟისორის ჯილდო გადაეცა ფილმისთვის Personal Shopper. ამ ფრანგი ხელოვანის ახალი ფილმის პრემიერა 2019 წელს ვენეციის კინოფესტივალზე შედგა, სადაც კრიტიკოსების ურთიერთსაწინააღმდეგო შეფასებები დაიმსახურა.

სწორედ ამ გამოხმაურების შემდეგ რეჟისორმა ფილმი ხელახლა დაამონტაჟა და ფართო საზოგადოება Wasp Network-ის განახლებულ ვერსიას ნეტფლიქსზე 19 ივნისიდან იხილავს.