ტვიტერმა 170 ათასზე მეტი ანგარიში წაშალა, რომელსაც ჩინეთის პროპაგანდის კამპანიასთან ჰქონდა კავშირი. ანგარიშები დეზინფორმაციის ავრცელებდნენ როგორც კორონავირუსზე, ასევე პეკინის რეჟიმის სასარგებლოდ ჰონგ-კონგის წინააღმდეგ. ამის შესახებ სოციალურმა ქსელების გიგანტმა გუშინ განაცხადა.

წაშლილი ანგარიშებიდან 23 750 ძირითადი იყო და სოციალურ ქსელში მაღალი ინგეიჯმენთით სარგებლობდა, ხოლო უფრო დიდი ჯგუფი, დაახლოებით 150 000 ანგარიში, მათი პოპულარობის გაზრდისთვის იყო შექმნილი.

გამოვლენილი ქსელის ანგარიშები ჩინეთის კომუნისტური პარტიის სასარგებლოდ გეოპოლიტიკურ ნარატივებზე აგებულ ცნობებს აზიარებდნენ, პარალელურად კი პოლიტიკური შინაარსის ყალბ ამბებს ავრცელებდნენ.

აღსანიშნავია, რომ ტვიტერი ჩინეთში დაბლოკილია, რადგანაც მთავრობა ცენზურის უმკაცრესი რეჟიმის გამტარებელია, თუმცა, მოქალაქეების უმრავლესობა სოციალურ ქსელს VPN-ის დაფარვის ზონის სერვისის საშუალებით იყენებს. ამის მიუხედავად, ექსპერტებს სჯერათ, რომ პროპაგანდა იმ ჩინურ ენაზე მოსაუბრე ადამიანებზე იყო გათვლილი, რომლებიც ქვეყნის საზღვრებს გარეთ ცხოვრობენ.

მკვლევრები ამბობენ, რომ ანგარიშები პოსტავდნენ ტაივანის შესახებ და მიზანში ჰყავდათ ამოღებული ჩინელი მილიარდერი გუო ვენგი, რომელიც, თავის მხრივ, პეკინის რეჟიმს ღიად აკრიტიკებს.

სტენფორდის ინტერნეტის ობსერვატორიის მკვლევარი რენე დირესტა ამბობს, რომ ანგარიშების დიდი ნაწილი, რომელიც კორონავირუსის შესახებ პოსტავდა, იანვარშია შექმნილი და ისინი პანდემიის ჩინეთის საზღვრების გარეთ გავრცელებასთან ერთად გააქტიურდნენ. ანალიზში ის დასძენს, რომ გავრცელებულ ნარატივში მოწონებული იყო ის სტრატეგია, რომლითაც ჩინეთი კორონავირუსს გაუმკლავდა. ამასთან ერთად, აკრიტიკებდნენ ჰონგ-კონგის პროტესტის აქტივისტებს და ამერიკას, სადაც COVID-19-ით გარდაცვალებულთა რიცხვი 115 ათასს აჭარბებს.

მკვლევრები დასძენენ, რომ ჩინურ ენაზე გამავრცელებელ პროპაგანდისტული ანგარიშებს ჯამში 348 608-ჯერ ჰქონდათ დატვიტული. იმის გამო, რომ ყალბი ანგარიშების დიდი ნაწილი ტვიტერმა დროულად გამოავლინა, მათ ცოტა გამომწერი ჰყავდა.

ჩინეთის საგარეო საქმეთა სამინისტრომ ტვიტერი მეორე დღესვე გააკრიტიკა:

"ტვიტერს რამე სასარგებლოს გაკეთება თუ სურს, გამოავლინოს და წაშალოს ის ორგანიზებული ჯგუფები, რომლებიც გამუდმებით თავს ესხმიან ჩინეთს ონლაინ. ჩინეთი დეზინფორმაციის უდიდესი მსხვერპლია და ჩვენ ყალბი ამბების წინააღმდეგი ვართ".

ეს ტვიტერის მიერ ჩინეთის მთავრობასთან დაკავშირებული პროპაგანდისტული ანგარიშების გამოვლენის პირველი შემთხვევა არ გახლავთ. 2019 წლის აგვისტოში, კომპანიამ 1000-მდე ანგარიში წაშალა, რომელიც ჰონგ-კონგის აქციების წინააღმდეგ ჩინეთის მთავრობისთვის სასარგებლო დეზინფორმაციას ავრცელებდა.

ტვიტერმა ასევე გამოავლინა და წაშალა პატარა ქსელები, რომელთა უკანაც რუსეთი და თურქეთი მოიაზრებიან. ათასზე მეტი ანგარიში "გაერთიანებული რუსეთის" სიძლიერეზე აძლიერებდა პროპაგანდას, ხოლო 7 340 ანგარიში თურქეთის პრეზიდენტის, რეჯეპ ტაიპ ერდოღანის კონსერვატიულ პარტიას აქებდა.