ევროპული საქართველოს წევრი, დავით ბაქრაძე ამბობს, რომ ის პარტიის პროპორციულ სიაში პირველი ნომერი იქნება. მან, ასევე, არ გამორიცხა, რომ თბილისში მაჟორიტარადაც იყაროს კენჭი.

"მე ვიქნები ძალიან აქტიურად ჩართული როგორც ევროპული საქართველოს პირველი ნომერი პარტიულ კამპანიაში და პროპორციულ ნაწილში და ნამდვილად არ გამოვრიცხავ, რომ, შეთანხმების შემთხვევაში, ვიყო ასევე თბილისის ერთ-ერთი რაიონის მაჟორიტარი ერთ-ერთი რაიონის", — განაცხადა ბაქრაძემ.

ევროპული საქართველოს ლიდერის, გიგა ბოკერიას თქმითაც, დიდი ალბათობით მაჟორიტარად იყრის კენჭს. ბოკერიამ არ თქვა რომელ ოლქში განიხილავს კანდიდატურას. ამასთან, მისმა თანაპარტიელმა და თბილისის ყოფილმა მერმა გიგი უგულავამ განაცხადა, რომ თბილისშიმაჟორიტარობას არ აპირებს.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

4 ივნისს ნაციონალურ მოძრაობაში განაცხადეს, რომ თბილისში 8 მაჟორიტარული ოლქიდან 6 ოპოზიციის კანდიდატებს დაუთმოს. ამავე დროს, პარტია წინასაარჩევნო კამპანიას თბილისის მხოლოდ ორ რაიონში — გლდანსა და სამგორში დაიწყებს.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: