ბოჭორიშვილის კლინიკის სამეთვალყურეო საბჭოს თავმჯდომარის, მაია სოლოღაშვილის განცხადებით, სომხეთისთვის დახმარების გაწევაზე გადაწყვეტილება სახელმწიფომ უნდა მიიღოს და მათი კლინიკა ცალკე რაიმე სახის ქმედებას არ აპირებს. მისი თქმით, აქვთ რესურსი "შიდა საჭიროებისთვის", თუმცა მეზობელი ქვეყნის დახმარებას არ გეგმავენ, რადგან არ იციან, როგორ განვითარდება მოვლენები საქართველოში.

"არავინ არ იცის, რამდენიმე დღეში, ხვალ ორი დღის შემდეგ, ორი კვირის შემდეგ, რა შეიძლება იყოს მოსალოდნელი ჩვენს ქვეყანაში, ეს არის ჩვენი კლინიკის პოზიცია. ამ ეტაპზე ყოველთვის ვართ მზად, რომ შიდა საჭიროებისთვის გვქონდეს რესურსი. დანარჩენი, ცენტრალიზებულად რა იქნება ქვეყანაში მიღებული გადაწყვეტილება, ალბათ ყველა ვიმოქედებთ იმის მიხედვით. [...]

ზოგადად გვქონდა მსჯელობა. კონკრეტულად ვთვლით, რომ ცალკეული კლინიკები არ მსჯელობენ. ბოჭორიშვილის კლინიკა არ მიიღებს გადაწყვეტილებას, როგორ დაეხმაროს მეზობელ ქვეყანას, ეს არის ქვეყნის მისაღები გადაწყვეტილება და შემდგომ ქვეყნის მიერ გადასანაწილებელი, თუ მიიღებს, რა თქმა უნდა, ამ გადაწყვეტილებას", — განაცხადა მან.

სოლოღაშვილის თქმით, ახლა ბოქსირებულ სექტორში ჰყავთ 50 პაციენტი და საჭიროების შემთხვევაში, შეუძლიათ სხვა პაციენტების მიღებაც, რომ "არ მოაკლონ ადგილი და მზრუნველობა".

სომხეთში რთული ეპიდსიტუაციაა. პრემიერმინისტრის, ნიკოლ ფაშინიანის განცხადებით, 200 პაციენტი ელოდება ჰოსპიტალიზაციას, მაგრამ მათ ადგილები არ აქვთ. მისივე თქმით, ორი პაციენტი გარდაიცვალა იმის გამო, რომ რეანიმაციაშიც არ იყო შესაბამისი ადგილები.

სომხეთის დახმარების მოთხოვნით საქართველოში მთავრობის მიმართ მანიფესტი შეიქმნა. საგარეო საქმეთა სამინისტროში აცხადებენ, რომ ქვეყანა მზად არის სომხეთის დასახმარებლად და ამის შესახებ მეზობელი ქვეყნის პრემიერი და საგარეო უწყება ინფორმირებულია.

გაიგეთ მეტი: