ჰომოფობიური, ქსენოფობიური და ძალადობრივი მოწოდებებით გამორჩეული ჯგუფი, ქართული მარში გეგმავს, პოლიტიკურ პარტიად გადაკეთდეს. ამის შესახებ ჯგუფის ლიდერმა, სანდრო ბრეგაძემ TV პირველთან ინტერვიუში განაცხადა. ბრეგაძე აღნიშნავს, რომ პარტიის დამფინანსებელი თავად იქნება.

"ჩვენ იძულებული გავხდით, წავსულიყავით პოლიტიკაში, რათა შეიქმნას მძლავრი, ეროვნული, ნაციონალისტური პოლიტიკური ცენტრი, ქართული მარშის ბაზაზე. გარდა პოლიტიკური პარტიის დაფუძნებისა, მიმდინარეობს აქტიური კონსულტაციები ჩვენი იდეოლოგიის მქონე ძალებთან, რათა შეიქმნას პოლიტიკური ცენტრი. პატრიოტთა ალიანსზე ვერ ვიტყვი ამას, მიუხედავად იმისა, რომ გვაქვს მეგობრული ურთიერთობა", — ამბობს სანდრო ბრეგაძე.

მისივე თქმით, ლევან ვასაძე არ აპირებს პოლიტიკაში წასვლას და "თუკი ის დააპირებს, ამას მიესალმება".

საერთაშორისო გამჭვირვალობა — საქართველოს კვლევით, ქართული მარში არაფორმალური გაერთიანებაა, რომელიც სხვადასხვა ნეონაცისტურ ორგანიზაციას აერთიანებს. გაერთიანებაში შემავალი პირები თუ ორგანიზაციები, უკვე წლებია, გამოირჩევიან ჰომოფობიური და რასისტული გამონათქვამებით და ხშირად მონაწილეობენ ძალადობრივ აქციებში. კვლევის მიხედვით:

  • ქართული მარშის გამოკვეთილი სახეები სანდრო ბრეგაძე და გია კორკოტაშვილი არიან;
  • სანდრო ბრეგაძე მოძრაობა ეროვნულების დამფუძნებელია;
  • 2016 წლის თებერვლამდე, მმართველი პარტიის, ქართული ოცნების ხელისუფლებაში ყოფნის დროს, ბრეგაძე დიასპორის საკითხებში სახელმწიფო მინისტრის მოადგილე იყო, მანამდე კი ლტოლვილთა და განსახლების მინისტრის მოადგილის პოზიცია ეკავა;
  • თანამდებობაზე ყოფნისას სანდრო ბრეგაძე გამოირჩეოდა ჰომოფობიური განცხადებებით;
  • 2004 წლამდე ბრეგაძე ასლან აბაშიძის პარტიის, საქართველოს დემოკრატიული აღორძინების წევრი იყო და მისი საარჩევნო ბლოკის სახელით წარმოდგენილი იყო პარლამენტში;
  • ბრეგაძეს 2011 წელს ცეცხლსასროლი იარაღის გამოყენებით ჩადენილი ხულიგნობისათვის მიესაჯა თავისუფლების აღკვეთა 6 წლის ვადით, რაც პირობით სასჯელში ჩაეთვალა.