რუსეთის პრეზიდენტმა, ვლადიმერ პუტინმა მის მიერვე ოკუპირებული ტერიტორიების დე ფაქტო ლიდერები, ასლან ბჟანია და ანატოლი ბიბილოვი 24 ივნისს მოსკოვში გამარჯვების აღლუმზე მიიწვია, რომელიც მეორე მსოფლიო ომში გამარჯვების 75 წლის იუბილეს ეძღვნება.

როგორც ცნობილია, აფხაზეთის დე ფაქტო პრეზიდენტი, ასლან ბჟანია აღლუმს დაესწრება. რაც შეეხება ოკუპირებული ცხინვალის ლიდერს, ანატოლი ბიბილოვს, მან გადაწყვიტა, რომ პუტინის მსგავსად 9 მაისის აღლუმი 24 ივნისს ჩაატაროს. ამასთან, ბიბილოვი მოსკოვის აღლუმზე დასწრებასაც დათანხმდა.

იქიდან გამომდინარე, რომ მოსკოვისა და ცხინვალის აღლუმი ერთ დღესაა დანიშნული, უცნობია, როგორ აპირებს ბიბილოვი მათზე დასწრებას. სახელმწიფო მედიასაშუალებებს ინფორმაცია ამის შესახებ არ გავრცელებულა.