როცა, როგორც იქნა, გრაიმსის და ილონ მასკის შვილის უჩვეულო სახელის წერა ვისწავლეთ, მისი მშობლები ადგნენ და ბავშვს სახელი შეუცვალეს.

თვის დასაწყისში Tesla-ს და Space X-ის დირექტორმა, ილონ მასკმა, შვილის დაბადება ტვიტერის პოსტით გვახარა და სახელიც გაგვიმხილა: X Æ A-12 მასკი.

თუმცა, მალევე გამოითქვა ვარაუდი, რომ უცნაურ მეტსახელს, შესაძლოა, ვერ დაეკმაყოფილებინა იმ შტატის კანონით გათვალისწინებული მოთხოვნები, სადაც წყვილი ცხოვრობს — კალიფორნიაში სახელისთვის მხოლოდ ინგლისური ენის 26 ანბანური სიმბოლოს გამოყენებაა დაშვებული.

კვირას გრაიმსმა ინსტაგრამზე ახალი ფოტო გამოაქვეყნა, რომლის კომენტარებშიც ფანები მისი შვილის სახელის ბედით დაინტერესდნენ.

"კალიფორნიის კანონების გამო ბავშვისთვის სახელის შეცვლა მოგიწიათ? ახლა რა ჰქვია?" — ჰკითხა მუსიკოსს სოციალური ქსელის ერთ-ერთმა მომხმარებელმა.

"X Æ A-Xii", — უპასუხა გრაიმსმა ისე, რომ სახელის ოდნავ შეცვლის მიზეზი არ დაუზუსტებია.

მომღერალმა სხვა კომენტარსაც უპასუხა: "ისე, რომაული ციფრები უკეთ გამოიყურება".

ბავშვი, რომელსაც X Æ A-12 ერქვა.

ფოტო: Elon Musk

გრაიმსს შვილის თავდაპირველი სახელის მნიშვნელობა ცნობისმოყვარე ფანებისთვის უკვე ახსნილი ჰქონდა.

კანადელმა მუსიკოსმა, რომლის ნამდვილი სახელი კლერ ელიზ ბუშეა, განაცხადა, რომ სახელში X უცნობ ცვლადს აღნიშნავს.

Æ ხელოვნური ინტელექტის ელფური მართლწერაა და, ამავდროულად, რამდენიმე ენაში, მათ შორის იაპონურში, სიყვარულს აღნიშნავს.

"A-12 წინამორბედია SR-17-სა, რომელიც ჩვენი საყვარელი კოსმოსური ხომალდია. არანაირი იარაღი, არანაირი თავდაცვა, მხოლოდ სიჩქარე. მებრძოლი, მაგრამ არაძალადობრივი", — დასძინა გრაიმსმა.

A სახელში მთავარანგელოზსაც (Archangel) აღნიშნავს, რომელიც, გრაიმსის განცხადებით, მისი საყვარელი სიმღერაა.

ფანები იმითაც დაინტერესდნენ, როგორ წარმოითქმის ბავშვის სახელი და ამაზე ბედნიერ წყვილს განსხვავებული ინტერპრეტაციები აღმოაჩნდა.

კითხვის პასუხად გრაიმსმა ინსტაგრამზე დაწერა: "X წარმოითქმის როგორც ასო-ბგერა ექსი. მერე A.I. — ჩვეულებრივ, როგორც ამბობთ ეი-ს (A) და შემდეგ აი-ს (I).

თუმცა, მასკმა პოდკასტის წამყვან ჯო როგანთან სახელის წარმოთქმის წესი სხვაგვარად ახსნა. "ანუ, ეს უბრალოდ ექსია, როგორც ასო-ბგერა. ხოლო, Æ ეშ-ად წარმოითქმის... შემდეგ კი, ეი-12, ეს უკანასკნელი ჩემი წვლილია სახელში", — განაცხადა მან.

X Æ A-Xii წყვილის პირველი საერთო შვილია. მასკს ხუთი სხვა შვილიც ჰყავს წინა ქორწინებიდან: ტყუპები — გრიფინი და ხავიერი და სამი ტყუპი — დემიენი, საქსონი და კაი.