ავსტრიის პრეზიდენტი ალექსანდერ ვან დერ ბელენი საკარანტინო წესების დარღვევის გამო ბოდიშს იხდის. BBC-ის ინფორმაციით, პრეზიდენტი რესტორანში ღამის 11 საათის შემდეგ დარჩა. მთავრობის განკარგულებით, ბარ-რესტორნები 11 საათზე იხურება.

ვან დერ ბელენი აცხადებს, რომ ვენის ცენტრში იტალიურ რესტორანს მეგობრებთან და ცოლთან ერთად ეწვია და დროის აღქმა დაკარგა.

"გულწრფელად ვწუხვარ. ეს შეცდომა იყო. იზოლაციის შემდეგ ჩემს ცოლთან და მეგობრებთან ერთად გარეთ პირველად გავედი", — განმარტავს ავსტრიის პრეზიდენტი.

როგორც ადგილობრივი მედია წერს, პრეზიდენტმა რესტორანი შუაღამით დატოვა და ის ქუჩაში პოლიციამ შეამჩნია. წესების დარღვევისთვის რესტორანი შესაძლოა დააჯარიმონ, თუმცა ვან დერ ბელენი აცხადებს, რომ დანაკარგის შემთხვევაში, პასუხისმგებლობას საკუთარ თავზე აიღებს.

თვითონ რესტორანი აცხადებს, რომ წესისამებრ ღამის 11 დაიკეტნენ და ეგონათ, რომ სტუმრებს ტერასაზე ყოფნის უფლება ჰქონდათ.

ავსტრია იყო ერთ-ერთი პირველი ქვეყანა ევროპაში, რომელმაც იტალიას მიბაძა და მკაცრი იზოლაცია დააწესა. გარდა ამისა, ის არის ერთ-ერთი პირველი, რომელმაც შეზღუდვების შემსუბუქება დაიწყო.