პანდემიის გამო შეჩერებული კინოწარმოების შემდეგ Avatar-ის სიქველი ერთ-ერთი პირველი დიდი ჰოლივუდური პროექტი იქნება, რომელზეც მუშაობა უახლოეს დღეებში აღდგება.

ფილმის პროდიუსერმა, ჯონ ლანდაუმ 21 მაისს ინსტაგრამზე გამოქვეყნებული პოსტით დააანონსა, რომ შემდეგ კვირაში ავატარის სამსახიობო და შემოქმედებითი გუნდი ახალ ზელანდიაში გადაღებებს დაუბრუნდება.

"ჩვენი გადასაღები მოედანი მზადაა და აღტაცებულები ვართ, რომ შემდეგ კვირას ახალ ზელანდიაში ვბრუნდებით", — წერს პროდიუსერი ინსტაგრამზე.

კორონავირუსის პანდემიის გამო მარტიდან მრავალი ფილმის გადაღებები შეჩერდა, მათ შორის იყო ავატარის სიქველიც, რომელსაც ახალ ზელანდიაში იღებენ.

ჯეიმს კამერონის ავატარი მაყურებელმა 2009 წელს იხილა და სამეცნიერო ფანტასტიკის ჟანრის ეს ფილმი ყველაზე მაღალშემოსავლიანი კინოსურათი გახდა. რეჟისორი აპირებს, რომ ფილმის კიდევ ოთხი ნაწილი გადაიღოს.

მათ შორის მეორე ფილმის პრემიერა, რომლის გადაღებაზეც ამჟამად მუშაობენ, 2021 წლის 21 დეკემბერსაა დაგეგმილი. მესამე, მეოთხე და მეხუთე ფილმებს მაყურებელი 2023, 2025 და 2027 წლებში იხილავს.