საქართველოს პარლამენტში ჟურნალისტების დაშვება ხვალიდან, 21 მაისიდან განახლდება.

პარლამენტის ინფორმაციით, მედია მუშაობას კორონავირუსის გავრცელების საწინააღმდეგო რეკომენდაციების სრული დაცვით განაახლებს — ჟურნალისტებს შენობაში შესვლისას ჩაუტარდებათ თერმოსკრინინგი, აუცილებელი იქნება პირბადის ტარება და სოციალური დისტანცირების პრინციპის დაცვა.

"დროებით გაგრძელდება შეზღუდვა მედიის წარმომადგენლების დასწრებაზე კომიტეტის სხდომებზე, ხოლო პლენარული სხდომის მიმდინარეობისას ისინი განთავსდებიან სპეციალურად მედიისთვის განკუთვნილ ლოჟაში", — აღნიშნავენ პარლამენტში.

რაც შეეხება ინტერვიუების ჩაწერას, ეს მხოლოდ რამდენიმე ადგილას იქნება შესაძლებელი — C კორპუსის მე-3 და მე-5, ხოლო B კორპუსის, მე-2 და მე-3 სართულები.

ამასთან, რეპონდენტებთან კომუნიკაციისას დაცული უნდა იყოს ჯანდაცვის სამინისტროსა და დაავადებათა კონტროლის ეროვნული ცენტრის მიერ რეკომენდებული დისტანცია.

პარლამენტის ინფორმაციითვე, ჩვეულ რეჟიმში გაგრძელდება საკომიტეტო და პლენარული სხდომების, ასევე ბრიფინგების და სხვა ღონისძიებების ტრანსლირება პარლამენტის ოფიციალურ ვებგვერდზე www.parliament.ge.

საკანონმდებლო ორგანოში ასევე აღნიშნავენ, რომ შენობაში პერიოდულად ტარება სადეზინფექციო ღონისძიებები და შენობის სხვადასხვა წერტილში დამონტაჟებულია სპეციალური სადეზინფექციო სითხეები.